ക്രിസ്റ്റ്യാനോയുടെ ഫിനിഷിങ് ഞെട്ടിച്ചു കളഞ്ഞു :മക്കോയ്സ്റ്റ്!

ഇന്നലെ പ്രീമിയർ ലീഗിൽ നടന്ന മത്സരത്തിൽ ഒന്നിനെതിരെ മൂന്ന് ഗോളുകൾക്കായിരുന്നു മാഞ്ചസ്റ്റർ യുണൈറ്റഡ് ബേൺലിയെ പരാജയപ്പെടുത്തിയത്. മത്സരത്തിൽ സൂപ്പർ താരം ക്രിസ്റ്റ്യാനോ റൊണാൾഡോ ഒരു ഗോളും ഒരു അസിസ്റ്റും സ്വന്തമാക്കിയിരുന്നു.മത്സരത്തിന്റെ 35-ആം മിനിറ്റിലായിരുന്നു ക്രിസ്റ്റ്യാനോയുടെ ഗോൾ പിറന്നത്. ബേൺലി ഗോൾകീപ്പറുടെ സേവിന് ശേഷം പോസ്റ്റിൽ തട്ടി വന്ന ബോൾ ക്രിസ്റ്റ്യാനോ റൊണാൾഡോ വലതു കാലിന്റെ പുറം ഭാഗം കൊണ്ട് വലയിലേക്ക് എത്തിക്കുകയായിരുന്നു.

താരത്തിന്റെ ഈ ഗോളിനെ മുൻ സ്കോട്ടിഷ് താരവും മാധ്യമപ്രവർത്തകനുമായി അല്ലി മക്കോയ്സ്റ്റ് പ്രശംസിച്ചിട്ടുണ്ട്. ക്രിസ്റ്റ്യാനോയുടെ ഫിനിഷിങ് തന്നെ ഞെട്ടിച്ചു കളഞ്ഞു എന്നാണ് ഇദ്ദേഹം അറിയിച്ചിട്ടുള്ളത്. മക്കോയ്സ്റ്റിന്റെ വാക്കുകൾ പ്രമുഖ മാധ്യമമായ മാഞ്ചസ്റ്റർ ഈവെനിംഗ് ന്യൂസ്‌ പുറത്ത് വിട്ടിരിക്കുന്നത് ഇങ്ങനെയാണ്.

” ആദ്യമായി ബേൺലി ഗോൾകീപ്പറുടെ സേവ് മികച്ചതായിരുന്നു.രണ്ടാമതായി ക്രിസ്റ്റ്യാനോ റൊണാൾഡോ തന്റെ വലതു കാലിന്റെ പുറം ഭാഗം കൊണ്ട് അത് ഫിനിഷ് ചെയ്തു എന്നുള്ളത് എനിക്ക് വിശ്വസിക്കാൻ സാധിക്കുന്നില്ല.ആ ഫിനിഷിങ് എന്നെ ഞെട്ടിപ്പിച്ചു കളഞ്ഞു.ഞാൻ കരുതിയത് ക്രിസ്റ്റ്യാനോ ഒന്ന് ടച്ച് ചെയ്തതിന് ശേഷം ഇടത് കാൽ കൊണ്ട് ഫിനിഷ് ചെയ്യുമെന്നായിരുന്നു.തീർച്ചയായും തന്റെ പിറകിൽ ഒരാളുണ്ടെന്ന് ക്രിസ്റ്റ്യാനോ കരുതിയിട്ടുണ്ടാവും.ഇപ്പോഴും എന്നെ അത്ഭുതപ്പെടുത്തുന്നത് ക്രിസ്റ്റ്യാനോയുടെ ആ ഫിനിഷിംഗ് തന്നെയാണ്.വളരെ കംഫർട്ടബിളായി കൊണ്ടാണ് റൊണാൾഡോ അത് ഫിനിഷ് ചെയ്തത്.

ക്രിസ്റ്റ്യാനോ ഈ പ്രീമിയർലീഗിൽ നേടുന്ന എട്ടാമത്തെ ഗോളായിരുന്നു അത്. ഈ സീസണിൽ ആകെ 14 ഗോളുകൾ പൂർത്തിയാക്കാൻ ക്രിസ്റ്റ്യാനോക്ക് കഴിഞ്ഞിട്ടുണ്ട്.