ക്രിസ്റ്റ്യാനോയുടെ പാത പിന്തുടർന്ന് ക്രിസ്റ്റ്യാനോ ജൂനിയറും!

സ്പോർട്ടിങ്ങിൽ നിന്നും മാഞ്ചസ്റ്റർ യുണൈറ്റഡിലേക്ക് എത്തിയതോട് കൂടെയാണ് ക്രിസ്റ്റ്യാനോ റൊണാൾഡോയെ ഫുട്ബോൾ ലോകം ശ്രദ്ധിച്ചു തുടങ്ങുന്നത്. പിന്നീട് താരത്തിന്റെ വളർച്ച അതിവേഗമായിരുന്നു. ഏഴാം നമ്പർ ജേഴ്സിയോടൊപ്പമുള്ള അദ്ദേഹത്തിന്റെ സഞ്ചാരം ക്രിസ്റ്റ്യാനോയെ വലിയൊരു ബ്രാൻഡ് തന്നെ ആക്കിമാറ്റുകയായിരുന്നു.

ഇപ്പോഴിതാ ക്രിസ്റ്റ്യാനോയുടെ പാതയിൽ തന്നെയാണ് അദ്ദേഹത്തിന്റെ മകനായ ക്രിസ്റ്റ്യാനോ റൊണാൾഡോ ജൂനിയറും ഇപ്പോൾ സഞ്ചരിച്ചുകൊണ്ടിരിക്കുന്നത്.ജൂനിയറെ യുണൈറ്റഡ് സൈൻ ചെയ്ത കാര്യം ഇപ്പോൾ ഔദ്യോഗികമായി തന്നെ സ്ഥിരീകരിക്കപ്പെട്ടിട്ടുണ്ട്.ഏഴാം നമ്പർ ജേഴ്‌സിയാണ് ക്രിസ്റ്റ്യാനോ ജൂനിയർ അണിയുക.യുണൈറ്റഡിന്റെ അണ്ടർ 11 ടീമിന് വേണ്ടിയാണ് ജൂനിയർ കളിക്കുക. ക്രിസ്റ്റ്യാനോയുടെ പാർട്ണറായ ജോർജിനയാണ് ഇക്കാര്യം തന്റെ സോഷ്യൽ മീഡിയയിലൂടെ അറിയിച്ചത്.

അതേസമയം ഇക്കാര്യം ക്രിസ്റ്റ്യാനോ പങ്കുവെച്ചിട്ടില്ല.ദിവസങ്ങൾക്ക് മുമ്പ് തന്റെ മകനോടൊപ്പം പരിശീലനം നടത്തുന്ന ഒരു ചിത്രം ക്രിസ്റ്റ്യാനോ പങ്കുവെച്ചിരുന്നു.പക്ഷെ തന്റെ മകനെ ഒരു ഫുട്ബോൾ താരമാവാൻ ഒരിക്കലും നിർബന്ധിച്ചിരുന്നില്ല എന്നുള്ള കാര്യം നേരത്തെ തന്നെ ക്രിസ്റ്റ്യാനോ വ്യക്തമാക്കിയിരുന്നു. ഇതേ കുറിച്ച് നെറ്റ്ഫ്ലിക്സിന്റെ ഒരു ഡോക്യൂമെന്ററിയിൽ ക്രിസ്റ്റ്യാനോ പറഞ്ഞിരുന്നത് ഇങ്ങനെയായിരുന്നു.

” ഞാൻ ഒരിക്കലും അവനിൽ സമ്മർദ്ദം ചെലുത്തിയിരുന്നില്ല. അവന് എന്താണോ വേണ്ടത് അതവന് ചെയ്യാം.എനിക്ക് വേണ്ടത് എന്റെ കാര്യങ്ങളിലാണ്.അവന് ആവശ്യമുള്ളതെന്താണോ അതവന് തിരഞ്ഞെടുക്കാം. എന്തായാലും ഞാനവനെ പിന്തുണക്കും ” ഇതായിരുന്നു റൊണാൾഡോ പറഞ്ഞിരുന്നത്.

ഏതായാലും റൊണാൾഡോയുടെ അതേവഴിയിലൂടെ തന്നെയാണ് ജൂനിയറും സഞ്ചരിക്കുന്നത്.ക്രിസ്റ്റ്യാനോയുടെ ശിക്ഷണത്തിൽ ജൂനിയറും ഒരു മികച്ച താരമാവുമെന്നുള്ള പ്രതീക്ഷയിലാണ് ആരാധകർ.