കളത്തിലേക്കിറങ്ങി ഹാലന്റിനൊപ്പം ഗോളാഘോഷിച്ചത് സാധാരണക്കാരനല്ല, ലോക ചാമ്പ്യനാണ്!

ഇന്നലെ ഇംഗ്ലീഷ് പ്രീമിയർ ലീഗിൽ നടന്ന മത്സരത്തിൽ വിജയം നേടാൻ മാഞ്ചസ്റ്റർ സിറ്റിക്ക് കഴിഞ്ഞിരുന്നു. ഒന്നിനെതിരെ രണ്ടു ഗോളുകൾക്കായിരുന്നു സിറ്റി ഷെഫീൽഡ് യുണൈറ്റഡിനെ പരാജയപ്പെടുത്തിയത്. സിറ്റിക്ക് വേണ്ടി സൂപ്പർ താരങ്ങളായ ഏർലിംഗ് ഹാലന്റ്,റോഡ്രി എന്നിവരായിരുന്നു ഗോളുകൾ നേടിയത്. മത്സരത്തിൽ ഹാലന്റ് ഒരു പെനാൽറ്റി നഷ്ടപ്പെടുത്തുകയും ചെയ്തിരുന്നു.

മത്സരത്തിന്റെ 63ആം മിനിട്ടിലാണ് ഹാലന്റിന്റെ ഗോൾ പിറന്നത്.ഗ്രീലിഷിന്റെ അസിസ്റ്റിൽ നിന്നായിരുന്നു ഹാലന്റ് ഗോൾ നേടിയിരുന്നത്. താരം ഗോൾ നേടിയതിന് പിന്നാലെ സ്റ്റേഡിയത്തിൽ നിന്നും ഒരാൾ മൈതാനത്തേക്ക് ഇറങ്ങുകയും ഹാലന്റിനൊപ്പം ഗോൾ ആഘോഷിക്കുകയും ചെയ്തു. എന്നാൽ അദ്ദേഹം വെറുമൊരു ആരാധകൻ മാത്രമായിരുന്നില്ല.മറിച്ച് ലോക ചാമ്പ്യൻ കൂടിയാണ്.

മുൻ ബോക്സിങ് വേൾഡ് ചാമ്പ്യനായ ടെറി ഫ്ലാനഗനായിരുന്നു ഹാലന്റിനൊപ്പം ഗോൾ ആഘോഷിച്ചിരുന്നത്. 2015, 2017 എന്നീ വർഷങ്ങളിൽ WBO ലൈറ്റ് വെയിറ്റ് കിരീടം വ്യക്തിയാണ് ടെറി.അദ്ദേഹം ഒരു മാഞ്ചസ്റ്റർ സിറ്റി ആരാധകൻ കൂടിയാണ്.ഹാലന്റിന്റെ ഗോളിൽ ആവേശം കൊണ്ട് അദ്ദേഹം സ്റ്റേഡിയത്തിൽ നിന്നും മൈതാനത്തേക്ക് ഇറങ്ങുകയായിരുന്നു.കളിക്കളത്തിലേക്ക് അദ്ദേഹം പ്രവേശിച്ചിരുന്നില്ല.സൈഡ് ലൈനിലായിരുന്നു ഗോൾ ആഘോഷിച്ചിരുന്നത്.

തുടർന്ന് സെക്യൂരിറ്റി സ്റ്റാഫുകളാണ് അദ്ദേഹത്തെ അവിടെനിന്നും മാറ്റിയത്. അദ്ദേഹത്തിന് ഒരു മത്സരത്തിൽ സ്റ്റേഡിയം ബാൻ ലഭിക്കാൻ സാധ്യതയുണ്ട്.പ്രീമിയർ ലീഗിൽ ആകെ മൂന്ന് മത്സരങ്ങളാണ് സിറ്റി കളിച്ചിട്ടുള്ളത്.മൂന്നിലും വിജയിച്ചു കൊണ്ട് ഒന്നാം സ്ഥാനത്ത് തുടരുന്നത് സിറ്റി തന്നെയാണ്. അടുത്ത മത്സരത്തിൽ ഫുൾഹാമാണ് സിറ്റിയുടെ എതിരാളികൾ.