ഒരിക്കൽക്കൂടി സിറ്റിയെ നേരിടാൻ ക്രിസ്റ്റ്യാനോ,കണക്കുകൾ അറിയാം!

പ്രീമിയർലീഗിലെ ഇരുപത്തിയെട്ടാം റൗണ്ട് പോരാട്ടത്തിൽ നഗര വൈരികളായ മാഞ്ചസ്റ്റർ സിറ്റിയെ നേരിടാനുള്ള ഒരുക്കത്തിലാണ് മാഞ്ചസ്റ്റർ യുണൈറ്റഡുള്ളത്. ഞായറാഴ്ച രാത്രി ഇന്ത്യൻ സമയം 10 മണിക്ക് മാഞ്ചസ്റ്റർ സിറ്റിയുടെ മൈതാനമായ ഇത്തിഹാദിൽ വെച്ചാണ് ഈയൊരു പോരാട്ടം അരങ്ങേറുക.ഈ സീസണിൽ ഇതിന് മുമ്പ് ഇരുവരും ഏറ്റുമുട്ടിയപ്പോൾ എതിരില്ലാത്ത രണ്ട് ഗോളുകൾക്ക് സിറ്റി വിജയിച്ചിരുന്നു. ആ തോൽവിക്ക് കണക്ക് ചോദിക്കാൻ യുണൈറ്റഡിന് സാധിക്കുമോ എന്നുള്ളതാണ് ആരാധകർക്ക് അറിയേണ്ടത്.

ഏതായാലും ക്രിസ്റ്റ്യാനോ റൊണാൾഡോ ഒരിക്കൽ കൂടി മാഞ്ചസ്റ്റർ സിറ്റിക്കെതിരെ കളിക്കാനുള്ള ഒരുക്കത്തിലാണ്.ഇതിന് മുമ്പ് നിരവധി മത്സരങ്ങൾ താരം സിറ്റിക്കെതിരെ കളിച്ചിട്ടുണ്ട്. നമുക്ക് അതിലെ കണക്കുകൾ ഒന്ന് പരിശോധിക്കാം.

15 തവണയാണ് ക്രിസ്റ്റ്യാനോ മാഞ്ചസ്റ്റർ സിറ്റിക്കെതിരെ ബൂട്ടഞ്ഞിട്ടുള്ളത്. അതിൽ 9 മത്സരങ്ങളിലും വിജയിക്കാൻ ക്രിസ്റ്റ്യാനോക്ക് കഴിഞ്ഞിട്ടുണ്ട്. രണ്ട് മത്സരങ്ങൾ സമനിലയായപ്പോൾ 4 മത്സരങ്ങളിൽ പരാജയപ്പെടുകയായിരുന്നു.

2003-ലാണ് ക്രിസ്റ്റ്യാനോ ആദ്യമായി സിറ്റിയെ നേരിടുന്നത്. അന്ന് ഒന്നിനെതിരെ മൂന്ന് ഗോളുകൾക്ക് മാഞ്ചസ്റ്റർ യുണൈറ്റഡ് വിജയിക്കുകയായിരുന്നു.എന്നാൽ ഏറ്റവും അവസാനമായി സിറ്റിയെ നേരിട്ടപ്പോൾ യുണൈറ്റഡ് പരാജയം രുചിച്ചു. അതേസമയം ക്രിസ്റ്റ്യാനോ റയലിനോടൊപ്പം സിറ്റിയെ നേരിട്ടപ്പോൾ ഒരുതവണ പോലും പരാജയം അറിഞ്ഞിട്ടില്ല.

15 മത്സരങ്ങളിൽ നിന്ന് ആകെ 5 ഗോളുകളാണ് ക്രിസ്റ്റ്യാനോ മാഞ്ചസ്റ്റർ സിറ്റിക്കെതിരെ നേടിയിട്ടുള്ളത്. ഇതിൽ നാല് ഗോളുകളും യുണൈറ്റഡിനോടൊപ്പമായിരുന്നു. ഒരു ഗോൾ റയൽ ജേഴ്‌സിയിൽ സ്വന്തമാക്കി.

വലിയൊരു മികവൊന്നും ക്രിസ്റ്റ്യാനോയ്ക്ക് സിറ്റിക്കെതിരെ അവകാശപ്പെടാനില്ല.നിലവിൽ ക്രിസ്റ്റ്യാനോയാവട്ടെ നല്ല നിലയിലുമല്ല. കഴിഞ്ഞ കുറച്ച് മത്സരങ്ങളിൽ ഗോൾ നേടാൻ ബുദ്ധിമുട്ടുന്ന ഒരു റൊണാൾഡോയെയാണ് ഇപ്പോൾ കാണാൻ സാധിക്കുക. എന്നിരുന്നാലും ഈ ഡെർബി പോരാട്ടത്തിൽ ആരാധകരുടെ പ്രതീക്ഷകൾ ക്രിസ്റ്റ്യാനോയുടെ കാലുകളിൽ തന്നെയാണ്.