ഒനാനക്ക് ഓഫർ നൽകി യുണൈറ്റഡ്,വഴങ്ങാതെ ഇന്റർ,പോരാട്ടം കടുത്തേക്കും!

മാഞ്ചസ്റ്റർ യുണൈറ്റഡിന്റെ പരിശീലകനായ എറിക്ക് ടെൻ ഹാഗിന് കീഴിൽ നേരത്തെ കളിച്ചിട്ടുള്ള ഗോൾ കീപ്പറാണ് ആൻഡ്രേ ഒനാന. നേരത്തെ അയാക്സിൽ വെച്ചായിരുന്നു ഇരുവരും ഒരുമിച്ചിരുന്നത്. നിലവിൽ ഇറ്റാലിയൻ ക്ലബ്ബായ ഇന്റർ മിലാന്റെ താരമാണ് ഒനാന.മികച്ച പ്രകടനമാണ് അദ്ദേഹം കഴിഞ്ഞ സീസണിലൊക്കെ നടത്തിയിട്ടുള്ളത്.

ഈ താരത്തെ യുണൈറ്റഡിലേക്ക് എത്തിക്കാൻ ടെൻ ഹാഗിന് വളരെയധികം താല്പര്യമുണ്ട്. എന്തെന്നാൽ യുണൈറ്റഡിന്റെ ഒന്നാം ഗോൾകീപ്പർ പൊസിഷനിലേക്ക് ഒനാനയെയാണ് ടെൻ ഹാഗ് പരിഗണിക്കുന്നത്. യുണൈറ്റഡ് ഗോൾകീപ്പറായ ഡേവിഡ് ഡിഹിയയുടെ ക്ലബ്ബ്മായുള്ള കോൺട്രാക്ട് അവസാനിച്ചിട്ടുണ്ട്.ഈ കരാർ പുതുക്കാൻ യുണൈറ്റഡ് തയ്യാറായിരുന്നില്ല.

യുണൈറ്റഡ് ഒനാനക്ക് വേണ്ടി പുതിയ ഒരു ഓഫർ നൽകിയിട്ടുണ്ട്.ആകെ 50 മില്യൺ യൂറോയാണ് വാഗ്ദാനം ചെയ്തിട്ടുള്ളത്. പക്ഷേ ഇന്റർ മിലാൻ ആവശ്യപ്പെടുന്നത് 60 മില്യൻ യൂറോയാണ്. ആവശ്യപ്പെടുന്ന തുക ഇന്റർ കുറക്കുമെന്നുള്ള പ്രതീക്ഷയിലാണ് യുണൈറ്റഡ് ഉള്ളതെങ്കിലും ഇന്റർ മിലാൻ ഇതുവരെ വഴങ്ങിയിട്ടില്ല.മൗണ്ടിനെ സ്വന്തമാക്കിയതോടെ യുണൈറ്റഡ് പൂർണമായും ശ്രദ്ധ പതിപ്പിച്ചിരിക്കുന്നത് ഈ കാമറൂൺ ഗോൾകീപ്പറിലാണ്.

അതേസമയം ക്രിസ്റ്റ്യാനോ റൊണാൾഡോയുടെ സൗദി അറേബ്യൻ ക്ലബ്ബായ അൽ നസ്റിന് ഈ താരത്തെ എത്തിക്കാൻ താല്പര്യമുണ്ട്.അവർ ഓഫറുകൾ ഒന്നും നൽകിയിട്ടില്ല. പക്ഷേ ഓഫറുകൾ നൽകി കഴിഞ്ഞാൽ ഒനാനക്ക് വേണ്ടിയുള്ള പോരാട്ടം കടുത്തേക്കും. ഈ താരത്തെ ലഭിച്ചില്ലെങ്കിൽ ഡിഹിയയുമായി പുതിയ കരാറിൽ ഏർപ്പെടാനായിരിക്കും യുണൈറ്റഡ് ശ്രമിക്കുക.