എന്ത് മാജിക്കാണ് കാണിച്ചത്? എല്ലാം പെട്ടെന്നായിരുന്നുവെന്ന് നിസ്റ്റൽറൂയി!

ഈ സീസണിൽ മാഞ്ചസ്റ്റർ യുണൈറ്റഡ് ഇതുവരെ മോശം പ്രകടനമായിരുന്നു നടത്തിയിരുന്നത്. അതുകൊണ്ടുതന്നെയാണ് അവരുടെ പരിശീലകനായ ടെൻഹാഗിനെ ക്ലബ്ബ് പുറത്താക്കിയത്. പകരം താൽക്കാലിക പരിശീലകനായി കൊണ്ട് നിസ്റ്റൽ റൂയിയെ യുണൈറ്റഡ് നിയമിക്കുകയും ചെയ്തു. ഇന്നലെ അദ്ദേഹത്തിന് കീഴിൽ തകർപ്പൻ വിജയമാണ് മാഞ്ചസ്റ്റർ യുണൈറ്റഡ് കരബാവോ കപ്പിൽ സ്വന്തമാക്കിയിട്ടുള്ളത്. രണ്ടിനെതിരെ 5 ഗോളുകൾക്കാണ് യുണൈറ്റഡ് ലെസ്റ്റർ സിറ്റിയെ പരാജയപ്പെടുത്തിയത്.മത്സരത്തിൽ ആധിപത്യം പുലർത്തിയതും യുണൈറ്റഡ് തന്നെയായിരുന്നു.

കാസമിറോയും ബ്രൂണോ ഫെർണാണ്ടസും ഇരട്ട ഗോളുകൾ നേടിയിട്ടുണ്ട്.ഗർനാച്ചോ ഒരു ഗോളും ഒരു അസിസ്റ്റും സ്വന്തമാക്കി. വളരെ ദയനീയ പ്രകടനം നടത്തിയിരുന്ന യുണൈറ്റഡ് ഇത്രയും ഗംഭീര വിജയം നേടിയത് ആരാധകർക്കിടയിൽ തന്നെ അത്ഭുതമുണ്ടാക്കിയിട്ടുണ്ട്. എന്ത് മാജിക്കാണ് കാണിച്ചത് എന്ന് നിസ്റ്റൽ റൂയിയോട് മത്സരശേഷം ചോദിക്കപ്പെട്ടിരുന്നു.കഴിഞ്ഞ മത്സരങ്ങളിൽ ഒന്നും തന്നെ ഇല്ലാതിരുന്ന ഭാഗ്യം ഇത്തവണ ഉണ്ടായിരുന്നു എന്നാണ് അദ്ദേഹം പറഞ്ഞിട്ടുള്ളത്.പരിശീലകന്റെ വാക്കുകൾ ഇങ്ങനെയാണ്.

” ഇന്ന് ഞങ്ങൾക്ക് കുറച്ച് ഭാഗ്യമുണ്ടായിരുന്നു. ഗോളടിച്ച താരങ്ങളുടെ കാര്യത്തിൽ എനിക്ക് സന്തോഷമുണ്ട്.കഴിഞ്ഞ രണ്ട് മത്സരങ്ങളിലും ഞങ്ങൾക്ക് ഒരുപാട് അവസരങ്ങൾ ലഭിച്ചിരുന്നു.പക്ഷേ അതൊന്നും ഗോളാക്കി മാറ്റാൻ കഴിഞ്ഞിരുന്നില്ല.പക്ഷേ പെട്ടെന്ന് ഞങ്ങൾക്ക് എല്ലാ ഭാഗ്യവും ലഭിച്ചു. അങ്ങനെ മികച്ച ഒരു വിജയം നേടാൻ കഴിഞ്ഞു.എപ്പോഴും ഞങ്ങളുടെ ലക്ഷ്യം അറ്റാക്ക് ചെയ്യുക എന്നതാണ്.തീർച്ചയായും ഈ വിജയത്തിന്റെ ക്രെഡിറ്റ് താരങ്ങൾ അർഹിക്കുന്നതാണ്. ആരാധകർക്ക് സന്തോഷത്തോടെ വീട്ടിൽ പോകാൻ കഴിഞ്ഞു എന്നതിൽ എനിക്ക് സന്തോഷമുണ്ട് ” ഇതാണ് യുണൈറ്റഡ് ഇതിഹാസം കൂടിയായ നിസ്റ്റൽ റൂയി പറഞ്ഞിട്ടുള്ളത്.

യുണൈറ്റഡിന്റെ പുതിയ പരിശീലകനായി കൊണ്ട് റൂബൻ അമോറിം വരികയാണ്.സ്പോട്ടിംഗ് സിപി ഇക്കാര്യത്തിൽ സ്ഥിരീകരണം നടത്തിയിരുന്നു.ഇനി യുണൈറ്റഡിന്റെ സ്ഥിരീകരണമാണ് വരാനുള്ളത്.അമോറിമിന് ടീമിനെ കൂടുതൽ മികച്ച രൂപത്തിലേക്ക് മാറ്റാൻ കഴിയും എന്നാണ് ആരാധകർ പ്രതീക്ഷിക്കുന്നത്.