ഇറ്റാലിയൻ സൂപ്പർ താരത്തെ സ്വന്തമാക്കാൻ യുണൈറ്റഡിനോട്‌ ക്രിസ്റ്റ്യാനോ ആവിശ്യപ്പെട്ടു?

ഈ ട്രാൻസ്ഫർ ജാലകത്തിലായിരുന്നു സൂപ്പർ താരം ക്രിസ്റ്റ്യാനോ റൊണാൾഡോ മാഞ്ചസ്റ്റർ യുണൈറ്റഡിലേക്ക് തിരികെ എത്തിയത്. കൂടാതെ ജേഡൻ സാഞ്ചോ, റാഫേൽ വരാനെ എന്നീ സൂപ്പർ താരങ്ങളെയും യുണൈറ്റഡ് സ്വന്തമാക്കിയിരുന്നു. എന്നിരുന്നാലും പ്രതീക്ഷിച്ച നിലവാരത്തിലേക്ക് ഉയരാൻ യുണൈറ്റഡിന് കഴിഞ്ഞിരുന്നില്ല.

ഇപ്പോഴിതാ മറ്റൊരു റൂമർ കൂടി ഫുട്ബോൾ ലോകത്ത് നിന്നും പുറത്തേക്ക് വരുന്നത്. യുവന്റസിന്റെ ഇറ്റാലിയൻ സൂപ്പർ താരമായ ഫെഡറിക്കോ കിയേസയെ സ്വന്തമാക്കാൻ മാഞ്ചസ്റ്റർ യുണൈറ്റഡിനോട് ക്രിസ്റ്റ്യാനോ ആവിശ്യപ്പെട്ടു എന്നാണ് അറിയാൻ കഴിയുന്നത്.പ്രമുഖ ഇറ്റാലിയൻ മാധ്യമമായ കാൽസിയോ മെർക്കാറ്റോയാണ് ഇക്കാര്യം പുറത്ത് വിട്ടിരിക്കുന്നത്. യുവന്റസിൽ ക്രിസ്റ്റ്യാനോ റൊണാൾഡോയുടെ സഹതാരമായിരുന്നു കിയേസ.

ഫിയോറെന്റിനയിൽ നിന്നും രണ്ട് വർഷത്തെ ലോൺ അടിസ്ഥാനത്തിലാണ് കിയേസ ഇപ്പോൾ യുവന്റസിൽ കളിച്ചു കൊണ്ടിരിക്കുന്നത്. മികച്ച പ്രകടനമാണ് താരം യുവന്റസിന് വേണ്ടിയും ഇറ്റലിക്ക്‌ വേണ്ടിയും കാഴ്ച്ചവെച്ച് കൊണ്ടിരിക്കുന്നത്. യൂറോ കപ്പിൽ ഇറ്റലിയെ ജേതാക്കളാക്കുന്നതിൽ നിർണായക പങ്കുവഹിക്കാൻ കിയേസക്ക്‌ കഴിഞ്ഞിരുന്നു. കഴിഞ്ഞ ചാമ്പ്യൻസ് ലീഗ് മത്സരത്തിൽ ചെൽസിക്കെതിരെ യുവന്റസിന്റെ വിജയ ഗോൾ നേടിയതും കിയേസയായിരുന്നു. ഇങ്ങനെ മിന്നുന്ന പ്രകടനമാണ് ഈ താരം ഇപ്പോൾ പുറത്തെടുക്കുന്നത്.

അത്കൊണ്ട് തന്നെയായിരിക്കണം ക്രിസ്റ്റ്യാനോ താരത്തെ ആവിശ്യപ്പെട്ടത്. ഏതായാലും ഏത് രൂപത്തിലായിരിക്കും കാര്യങ്ങൾ പുരോഗമിക്കുക എന്നുള്ളത് കണ്ടറിയേണ്ടിയിരിക്കുന്നു.