ആന്റണിക്കെതിരെയുള്ള വിമർശനം, പിന്തുണയുമായി ഫ്രഡ്‌!

കഴിഞ്ഞ യൂറോപ്പ ലീഗ് മത്സരത്തിൽ മാഞ്ചസ്റ്റർ യുണൈറ്റഡ് മികച്ച വിജയം നേടിയിരുന്നു. എതിരില്ലാത്ത മൂന്ന് ഗോളുകൾക്കായിരുന്നു യുണൈറ്റഡ് ഷെറിഫിനെ പരാജയപ്പെടുത്തിയത്.മത്സരത്തിൽ ബ്രസീലിയൻ സൂപ്പർതാരം ആന്റണി ചില തന്റെ സ്കില്ലുകൾ പുറത്തെടുത്തിരുന്നു. അദ്ദേഹത്തിന്റെ സ്പിൻ സ്കിൽ ഫുട്ബോൾ ലോകത്ത് വലിയ ചർച്ചയാവുകയും ചെയ്തു.

അതായത് ആന്റണി വെറും ഷോ ഓഫാണ് എന്നായിരുന്നു യുണൈറ്റഡ് ഇതിഹാസമായ പോൾ സ്ക്കോൾസ്‌ പറഞ്ഞിരുന്നത്.അതേസമയം ആന്റണിയുടെ സ്കില്ല് പ്രവർത്തനക്ഷമമല്ലെങ്കിൽ തിരുത്തുമെന്നും പരിശീലകനായ ടെൻ ഹാഗ് അറിയിച്ചിരുന്നു.എന്നാൽ താരത്തിന് പിന്തുണയുമായി സഹതാരമായ ഫ്രഡ്‌ രംഗത്ത് വന്നിട്ടുണ്ട്. ആന്റണി ചെയ്യുന്ന കാര്യങ്ങൾ അദ്ദേഹം തുടരണമെന്നാണ് ഫ്രഡ്‌ പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ ഗോൾ ഡോട്ട് കോം റിപ്പോർട്ട് ചെയ്യുന്നത് ഇങ്ങനെയാണ്.

” ഞങ്ങൾ ബ്രസീലുകാർ ആയതിനാലാണ് ഇതൊക്കെ തുടങ്ങുന്നത് എന്നാണ് ഞാൻ കരുതുന്നത്.ബ്രസീലുകാർക്ക് ക്വാളിറ്റി എന്നുള്ളത് അവരുടെ രക്തത്തിൽ അലിഞ്ഞു ചേർന്ന ഒന്നാണ്.പെലെയുടെ കാലം തൊട്ടേ ഞങ്ങൾ ഇങ്ങനെയാണ്.ഡ്രിബിൾ ചെയ്യുന്നു, ഗോളുകൾ നേടുന്നു,ഡാൻസ് ചെയ്യുന്നു, ചിരിക്കുന്നു,ഇതൊക്കെയാണ് ഞങ്ങൾ.ഞങ്ങൾ എന്താണ് എന്നുള്ളത് ആളുകൾ മനസ്സിലാക്കുമെന്ന് ഞാൻ കരുതുന്നു.അദ്ദേഹം ചെയ്തത് ആരെങ്കിലും അപമാനിക്കാൻ വേണ്ടിയല്ല.അദ്ദേഹത്തിന്റെ പ്രകടനം അങ്ങനെയാണ്.അതിൽ ഒരു കുഴപ്പവുമില്ല.ആന്റണി അത് തുടരുകയാണ് വേണ്ടത്. വിമർശനങ്ങളെ അദ്ദേഹം വകവെക്കേണ്ട കാര്യമില്ല ” ഫ്രഡ്‌ പറഞ്ഞു.

അതേസമയം ഈ വിഷയത്തിൽ ആന്റണി തന്റെ നിലപാട് നേരത്തെ അറിയിച്ചിരുന്നു. തന്റെ സ്കില്ലുകൾ താൻ തുടരുമെന്നായിരുന്നു ആന്റണി അറിയിച്ചിരുന്നത്.