MNM മിന്നിച്ചു,ട്രോയസ്‌ വെല്ലുവിളി അതിജീവിച്ച് പിഎസ്ജി!

ഇന്നലെ ലീഗ് വണ്ണിൽ നടന്ന മത്സരത്തിൽ നിലവിലെ ചാമ്പ്യന്മാരായ പിഎസ്ജി വിജയം സ്വന്തമാക്കി. മൂന്നിനെതിരെ നാലു ഗോളുകൾക്കാണ് പിഎസ്ജി ട്രോയസിനെ പരാജയപ്പെടുത്തിയത്.സൂപ്പർ താരങ്ങളായ ലയണൽ മെസ്സി,നെയ്മർ ജൂനിയർ,കിലിയൻ എംബപ്പേ എന്നിവരുടെ മികവാണ് പിഎസ്ജിക്ക് ഒരിക്കൽ കൂടി തുണയായിട്ടുള്ളത്.

മത്സരത്തിന്റെ മൂന്നാം മിനിറ്റിൽ തന്നെ ബാൾഡേയുടെ ഗോളിലൂടെ പിഎസ്ജി പിറകോട്ട് പോയിരുന്നു. എന്നാൽ 24ആം മിനിട്ടിൽ നെയ്മറുടെ അസിസ്റ്റിൽ നിന്ന് സോളർ സമനില ഗോൾ കണ്ടെത്തി.എന്നാൽ 52ആം മിനുട്ടിൽ ബാൾഡെ വീണ്ടും ട്രോയസിന് ലീഡ് നേടിക്കൊടുക്കുകയായിരുന്നു.

എന്നാൽ 55ആം മിനുട്ടിൽ തകർപ്പൻ ഒരു ഷോട്ടിലൂടെ ലയണൽ മെസ്സി പിഎസ്ജിക്ക് സമനില നേടിക്കൊടുത്തു.62ആം മിനുട്ടിൽ നെയ്മറുടെ ഗോൾ പിറന്നു. ലയണൽ മെസ്സിയുടെ പാസിൽ നിന്നാണ് നെയ്മർ ഗോൾ നേടിയത്.77ആം മിനുട്ടിൽ കിലിയൻ എംബപ്പേ പിഎസ്ജിയുടെ ലീഡ് വർദ്ധിപ്പിച്ചു. പിന്നീട് ട്രോയസ് ഒരു ഗോൾ കൂടി നേടിയെങ്കിലും പരാജയം സമ്മതിക്കേണ്ടി വരികയായിരുന്നു.

നിലവിൽ 35 പോയിന്റ് ഉള്ള പിഎസ്ജി തന്നെയാണ് പട്ടികയിൽ ഒന്നാം സ്ഥാനത്ത് നിലനിൽക്കുന്നത്. ഈ സീസണിൽ ഒരൊറ്റ പരാജയം പോലും അറിയാത്ത ടീമുകളിൽ ഒന്നു കൂടിയാണ് പിഎസ്ജി.