ലീഗ് വണ്ണിലെ ആദ്യ ഗോൾ, സന്തോഷവാനാണെന്ന് മെസ്സി!

ഇന്നലെ ലീഗ് വണ്ണിൽ നടന്ന മത്സരത്തിൽ പിഎസ്ജി നാന്റെസിനെ പരാജയപ്പെടുത്തിയിരുന്നു. ഒന്നിനെതിരെ മൂന്ന് ഗോളുകൾക്കാണ് പിഎസ്ജി വിജയം സ്വന്തമാക്കിയത്. മത്സരത്തിൽ സൂപ്പർ താരം ലയണൽ മെസ്സി ഗോൾ കണ്ടെത്തിയിരുന്നു.87-ആം മിനുട്ടിൽ ഒരു തകർപ്പൻ ഷോട്ടിലൂടെയാണ് മെസ്സി ഗോൾ നേടിയത്.ലീഗ് വണ്ണിൽ മെസ്സി നേടുന്ന കന്നി ഗോളായിരുന്നു ഇത്.

ഏതായാലും ഈ ഗോൾ നേടാനായതിൽ മെസ്സി സന്തോഷം പ്രകടിപ്പിച്ചിട്ടുണ്ട്.മത്സരത്തിൽ ഗോൾ നേടാനാവുമെന്ന് തനിക്ക് പ്രതീക്ഷയുണ്ടായിരുന്നുവെന്നും മെസ്സി കൂട്ടിച്ചേർത്തു. മത്സരശേഷം ആമസോൺ പ്രൈമിനോട് സംസാരിക്കുകയായിരുന്നു അദ്ദേഹം.

” ഞാൻ സന്തോഷവാനാണ്.ഞങ്ങൾക്ക്‌ ഒരുപാട് അവസരങ്ങൾ ലഭിച്ചിരുന്നു.പക്ഷേ അവരുടെ ഗോൾകീപ്പർ മികച്ച സേവുകൾ നടത്തി.പക്ഷേ ഞങ്ങൾക്ക്‌ ഭയമില്ലായിരുന്നു.ഞങ്ങൾ വിജയിക്കുകയും ചെയ്തു.ലീഗിലെ ആദ്യ ഗോൾ നേടാനായതിൽ ഞാൻ സന്തോഷവാനാണ്.അതും പാർക്ക്‌ ഡെസ് പ്രിൻസസിലെ സ്വന്തം ആരാധകർക്ക്‌ മുന്നിൽ നേടാനായി എന്നുള്ളത് കൂടുതൽ സന്തോഷം പകരുന്നത്.ചാമ്പ്യൻസ് ലീഗിൽ നേരത്തെ ഗോൾ നേടി. ഈ മത്സരത്തിൽ ഗോൾ നേടാൻ കഴിയുമെന്ന് പ്രതീക്ഷയുണ്ടായിരുന്നു ” മെസ്സി പറഞ്ഞു.