റാമോസിന്റെ പിഎസ്ജി അരങ്ങേറ്റം മുൻ ക്ലബ്ബിനെതിരെ?

ഈ ട്രാൻസ്ഫർ ജാലകത്തിലായിരുന്നു സൂപ്പർ താരം സെർജിയോ റാമോസ് റയൽ വിട്ട് പിഎസ്ജിയിൽ എത്തിയത്.റാമോസ് പിഎസ്ജിയോടൊപ്പം പരിശീലനം ആരംഭിച്ചിട്ടുമുണ്ട്. എന്നാൽ ആരാധകർ ഒന്നടങ്കം താരത്തിന്റെ പിഎസ്ജി ജേഴ്സിയിലുള്ള അരങ്ങേറ്റത്തിന് കാത്തിരിക്കുകയാണ്. ഇപ്പോഴിതാ തന്റെ മുൻ ക്ലബ്ബിനെതിരെ അരങ്ങേറാനുള്ള സുവർണ്ണാവസരം റാമോസിനെ തേടിയെത്തിയിട്ടുണ്ട്. പിഎസ്ജി തങ്ങളുടെ അഞ്ചാമത്തെ സൗഹൃദമത്സരം കളിക്കുന്നത് സ്പാനിഷ് ക്ലബായ സെവിയ്യക്കെതിരെയാണ്. റാമോസിന്റെ മുൻ ക്ലബായ സെവിയ്യക്കെതിരെ താരത്തെ പരിശീലകൻ പോച്ചെട്ടിനോ കളത്തിലേക്കിറക്കുമോ എന്നതാണ് ഇനി അറിയാനുള്ളത്.

ജൂലൈ ഇരുപത്തിയേഴാം തിയ്യതി ഇന്ത്യൻ സമയം രാത്രി 11:30-നാണ് പിഎസ്ജിയും സെവിയ്യയും തമ്മിൽ ഏറ്റുമുട്ടുക.പോർച്ചുഗല്ലിൽ വെച്ചാണ് മത്സരം നടത്തപ്പെടുക. ഇതിന് മുമ്പ് മൂന്ന് സൗഹൃദമത്സരങ്ങൾ പിഎസ്ജി കളിച്ചു കഴിഞ്ഞു.ആദ്യമത്സരത്തിൽ ലെ മാൻസിനെ എതിരില്ലാത്ത നാല് ഗോളുകൾക്ക്‌ പിഎസ്ജി തകർത്തു വിട്ടിരുന്നു. പിന്നീട് കാമ്പ്ലിക്കെതിരെയുള്ള മത്സരത്തിൽ 2-2 ന്റെ സമനില വഴങ്ങി.അതിന് ശേഷം നടന്ന മത്സരത്തിൽ ഓഗ്സ്ബർഗിനെ 2-1 ന് പരാജയപ്പെടുത്താനും പിഎസ്ജിക്ക്‌ കഴിഞ്ഞു. ഇനി ജെനോവക്കെതിരെയുള്ള മത്സരത്തിന് ശേഷമാണ് പിഎസ്ജി സെവിയ്യയോട് ഏറ്റുമുട്ടുക.1996 മുതൽ 2005 വരെ സെവിയ്യയുടെ ഭാഗമായിരുന്നു റാമോസ്. പിന്നീട് റയലിൽ ദീർഘകാലം ചിലവഴിച്ച ശേഷമാണ് റാമോസ് പിഎസ്ജിയിൽ എത്തിയത്.