രണ്ട് തവണ പെനാൽറ്റിയിൽ പാഴാക്കി എംബപ്പേ,മെസ്സി ഗോളടിച്ച മത്സരത്തിൽ പിഎസ്ജിക്ക് വിജയം.

ഇന്നലെ ലീഗ് നടന്ന മത്സരത്തിൽ നിലവിലെ ചാമ്പ്യന്മാരായ പിഎസ്ജി തകർപ്പൻ വിജയം സ്വന്തമാക്കിയിട്ടുണ്ട്. ഒന്നിനെതിരെ മൂന്നു ഗോളുകൾക്കാണ് പിഎസ്ജി മോന്റ്പെല്ലിയറിനെ പരാജയപ്പെടുത്തിയത്. സൂപ്പർതാരം ലയണൽ മെസ്സി ഉൾപ്പെടെയുള്ളവരാണ് പിഎസ്ജിക്ക് വേണ്ടി ഗോളുകൾ കണ്ടെത്തിയത്.

മത്സരത്തിന്റെ ഒമ്പതാം മിനിറ്റിൽ പിഎസ്ജിക്ക് അനുകൂലമായി ലഭിച്ച പെനാൽറ്റി സൂപ്പർ താരം കിലിയൻ എംബപ്പേ പാഴാക്കുകയായിരുന്നു.എന്നാൽ എതിർ താരം പെനാൽറ്റി ബോക്സിലേക്ക് നേരത്തെ പ്രവേശിച്ചതിനാൽ റഫറി ഈ പെനാൽറ്റി വീണ്ടും എടുക്കാൻ ആവശ്യപ്പെട്ടു. അതും എംബപ്പേ പാഴാക്കി.റീ ബൗണ്ട് ലഭിച്ചതും ഗോളാക്കി മാറ്റാൻ അദ്ദേഹത്തിന് സാധിക്കാതെ പോവുകയായിരുന്നു. പിന്നീട് പരിക്ക് മൂലം അദ്ദേഹം കളം വിടുകയും ചെയ്തു.

ആദ്യ പകുതിയിൽ ഗോളുകൾ ഒന്നും നേടാൻ പിഎസ്ജി സാധിച്ചിരുന്നില്ല. 55ആം മിനിട്ടിലാണ് പിഎസ്ജിയുടെ ആദ്യ ഗോൾ പിറക്കുന്നത്.ഹ്യൂഗോ എകിറ്റികെയുടെ അസിസ്റ്റിൽ നിന്ന് ഫാബിയാൻ റൂയിസാണ് പിഎസ്ജിയുടെ അക്കൗണ്ട് ഓപ്പൺ ആക്കിയത്.പിന്നീട് മെസ്സിയുടെ ഗോൾ വന്നു.72ആം മിനുട്ടിൽ റൂയിസിന്റെ അസിസ്റ്റിൽ നിന്നാണ് മെസ്സി ഗോൾ കണ്ടെത്തിയത്.89ആം മിനിറ്റിൽ എതിരാളികൾ ഒരു ഗോൾ തിരിച്ചടിച്ചു. എന്നാൽ 92ആം മിനിറ്റിൽ എമരി ഗോൾ നേടിയതോടുകൂടി പിഎസ്ജി വിജയം ഉറപ്പാക്കുകയായിരുന്നു.

പരിക്ക് മൂലം നെയ്മർ ജൂനിയർ ഈ മത്സരത്തിൽ കളിച്ചിരുന്നില്ല. 51 പോയിന്റ് ഉള്ള പിഎസ്ജി തന്നെയാണ് നിലവിൽ ഒന്നാം സ്ഥാനത്ത്.