മെസ്സി ഗോളടിച്ചു,പിഎസ്ജി വിജയിച്ചു!

ഒരല്പം മുമ്പ് നടന്ന പ്രീ സീസൺ സൗഹൃദ മത്സരത്തിൽ ഫ്രഞ്ച് വമ്പൻമാരായ പിഎസ്ജിക്ക് വിജയം. ഒന്നിനെതിരെ രണ്ട് ഗോളുകൾക്ക് ജാപ്പനീസ് ക്ലബ്ബായ കവാസാക്കി ഫ്രോന്റെയിലിനെയാണ് പിഎസ്ജി പരാജയപ്പെടുത്തിയത്. സൂപ്പർ താരം ലയണൽ മെസ്സി പിഎസ്ജിക്ക് വേണ്ടി ഒരു ഗോൾ നേടിയപ്പോൾ കലിമുവന്റോയാണ് ശേഷിച്ച ഗോൾ കരസ്ഥമാക്കിയത്.

സൂപ്പർ താരങ്ങളായ ലയണൽ മെസ്സിയും നെയ്മർ ജൂനിയറും കിലിയൻ എംബപ്പേയും പിഎസ്ജിയുടെ ആദ്യ ഇലവനിൽ ഉണ്ടായിരുന്നു.മത്സരത്തിന്റെ 33-ആം മിനിട്ടിലാണ് മെസ്സി പിഎസ്ജിക്ക് ലീഡ് നേടിക്കൊടുത്തത്.ഹക്കീമിയുടെ പാസിൽ നിന്നും ഒരു ഷോട്ടിലൂടെയാണ് മെസ്സി വല കുലുക്കിയത്.

58 ആം മിനിറ്റിൽ കലിമുവന്റോ പിഎസ്ജിയുടെ ലീഡ് വർദ്ധിപ്പിക്കുകയായിരുന്നു. 84ആം മിനിറ്റിൽ യമാമുറ ഒരു ഗോൾ നേടിയെങ്കിലും കവാസാക്കിക്ക് അത് മതിയാകുമായിരുന്നില്ല. തുടർച്ചയായ രണ്ടാം സൗഹൃദമത്സരത്തിലാണ് പിഎസ്ജി വിജയിക്കുന്നത്.ഉർവ റെഡ് ഡയമണ്ട്സിനെതിരെയാണ് പിഎസ്ജിയുടെ അടുത്ത സൗഹൃദ മത്സരം.