മെസ്സിക്ക് പിന്നാലെ റാമോസും പടിയിറങ്ങുന്നു,ഇന്ന് അവസാന മത്സരം!

ഫ്രഞ്ച് വമ്പൻമാരായ പിഎസ്ജി ഇന്ന് നടക്കുന്ന മത്സരത്തിൽ ക്ലർമോന്റ് ഫൂട്ടിനെയാണ് നേരിടുക. ഇന്ന് രാത്രി ഇന്ത്യൻ സമയം 12:30ന് പിഎസ്ജിയുടെ മൈതാനമായ പാർക്ക് ഡെസ് പ്രിൻസസിലാണ് ഈയൊരു മത്സരം അരങ്ങേറുക.ഈ സീസണിലെ അവസാന മത്സരമാണ് പിഎസ്ജി ഇന്ന് കളിക്കുന്നത്.നേരത്തെ ലീഗ് കിരീടം ക്ലബ്ബ് സ്വന്തമാക്കിയിരുന്നു.

സൂപ്പർതാരം ലയണൽ മെസ്സിയുടെ പിഎസ്ജി ജേഴ്സിയിലുള്ള അവസാനത്തെ മത്സരം കൂടിയാണിത്. ഇന്നത്തെ മത്സരത്തോടുകൂടി മെസ്സി ക്ലബ്ബിനോട് വിട പറയും.ഫ്രീ ഏജന്റായി കൊണ്ടാണ് മെസ്സി ക്ലബ്ബ് വിടുന്നത്.അടുത്ത സീസണിൽ ഏത് ക്ലബ്ബിലായിരിക്കും എന്നുള്ളത് പ്രഖ്യാപിക്കപ്പെട്ടിട്ടില്ല.

രണ്ട് വർഷങ്ങൾക്കു മുമ്പ് മെസ്സിക്കൊപ്പം പാരീസിൽ എത്തിയ മറ്റൊരു സൂപ്പർതാരമാണ് സെർജിയോ റാമോസ്. റയൽ മാഡ്രിഡിൽ നിന്നും ഫ്രീ ട്രാൻസ്ഫറിൽ എത്തിയ അദ്ദേഹം ഇപ്പോൾ മെസ്സിയോടൊപ്പം പിഎസ്ജി വിടുകയാണ്.താരം കരാർ പൂർത്തിയാക്കി കൊണ്ടാണ് ക്ലബ്ബ് വിടുന്നത്. താരത്തിന്റെ കരാർ പുതുക്കാൻ ക്ലബ്ബിനെ താല്പര്യമില്ലാതെ വന്നതോടുകൂടിയാണ് അദ്ദേഹം ക്ലബ്ബ് വിടാൻ തീരുമാനിച്ചിട്ടുള്ളത്.

ഇന്നത്തെ മത്സരം പിഎസ്ജിയിലെ തന്റെ അവസാനത്തെ മത്സരമാണെന്ന് റാമോസും പ്രഖ്യാപിച്ചു കഴിഞ്ഞു. രണ്ട് പ്രധാനപ്പെട്ട താരങ്ങളെയാണ് ഇപ്പോൾ ക്ലബ്ബിന് നഷ്ടമാവുന്നത്. ഈ സീസണിൽ രണ്ടുപേരും ക്ലബ്ബിന് വേണ്ടി മികച്ച പ്രകടനങ്ങൾ നടത്തിയെങ്കിലും ടീം എന്ന നിലയിൽ മോശം പ്രകടനമായിരുന്നു പിഎസ്ജി നടത്തിയിരുന്നത്.ഇതാണിപ്പോൾ വിനയായിരിക്കുന്നത്.