ബാലൺ ഡിയോർ നേടണോ? പിഎസ്ജി വിടൂ, എംബപ്പേക്ക് ഫ്രഞ്ച് ഇതിഹാസത്തിന്റെ ഉപദേശം!

സൂപ്പർ താരം കിലിയൻ എംബപ്പേ പിഎസ്ജി വിട്ടേക്കുമെന്നുള്ള അഭ്യൂഹങ്ങളിപ്പോൾ സജീവമാണ്. എന്നാൽ പിഎസ്ജിക്കാവട്ടെ താരത്തെ വിട്ടു നൽകാൻ താല്പര്യവുമില്ല. ഏതായാലും താരത്തിന്റെ ഭാവി അനിശ്ചിതത്വത്തിലായിരിക്കുന്ന ഈ സമയത്ത് എംബപ്പേയോട് പിഎസ്ജി വിടാൻ ഉപദേശിച്ചിരിക്കുകയാണ് ഫ്രഞ്ച് ഇതിഹാസതാരമായ നിക്കോളാസ് അനെൽക്ക.എംബപ്പേക്ക് ബാലൺ ഡിയോർ പോലെയുള്ള വലിയ നേട്ടങ്ങൾ ലഭിക്കണമെങ്കിൽ തീർച്ചയായും അദ്ദേഹം പിഎസ്ജിയും ഫ്രഞ്ച് ലീഗും വിട്ട് മികച്ച ലീഗുകളിലേക്ക് ചേക്കേറണമെന്നാണ് ഇദ്ദേഹത്തിന്റെ കണ്ടെത്തൽ.കഴിഞ്ഞ ദിവസം അത്ലറ്റിക്ക് എന്ന മാധ്യമത്തോട് സംസാരിക്കുകയായിരുന്നു അനൽക്കെ.

” നിങ്ങൾക്ക് വലിയ നേട്ടങ്ങൾ ലഭിക്കണമെന്ന് ആഗ്രഹമുണ്ടെങ്കിൽ നിങ്ങൾ പിഎസ്ജി വിടേണ്ടതുണ്ട്.നിങ്ങൾ പിഎസ്ജിയിൽ ചെയ്യുന്നതെല്ലാം നല്ലതായിരിക്കും.പക്ഷേ അത്‌ ഫ്രാൻസിൽ മാത്രം ഒതുങ്ങി നിൽക്കും. അതിന് കൂടുതൽ മൂല്യം ലഭിക്കണമെങ്കിൽ ലോകത്തെ ഏറ്റവും മികച്ച ലീഗുകൾ ഉള്ള ഇംഗ്ലണ്ടിലോ സ്പെയിനിലോ ആയിരിക്കണം.ഫ്രാൻസിൽ തുടർന്നാൽ ബെസ്റ്റ് ലീഗിൽ കളിക്കുന്ന ബെസ്റ്റ് താരങ്ങളോട് മത്സരിക്കാനാവില്ല.ബാലൺ ഡിയോർ നേടണമെങ്കിൽ, മെസ്സിയെയും ക്രിസ്റ്റ്യാനോയെ പോലെയും ആവണമെങ്കിൽ നിങ്ങൾ മികച്ചവരോട് മത്സരിക്കേണ്ടതുണ്ട്.പിഎസ്ജിയിൽ നിൽക്കുകയാണെങ്കിൽ അതിന് സാധിക്കില്ല. അതിനർത്ഥം ഫ്രഞ്ച് ലീഗ് ഈസി ആണെന്നല്ല.പക്ഷേ ഏറ്റവും ബുദ്ധിമുട്ടേറിയ ലീഗ് ഇംഗ്ലണ്ടിൽ ആണെന്നാണ് ഞാൻ വിശ്വസിക്കുന്നത്.അത്കൊണ്ട് തന്നെ ഏറ്റവും മികച്ചതാവാൻ ആഗ്രഹമുണ്ടെങ്കിൽ ചെൽസി, മാഞ്ചസ്റ്റർ യുണൈറ്റഡ്,സിറ്റി, ലിവർപൂൾ, ആഴ്സണൽ എന്നീ ക്ലബുകളിൽ ഒന്നിലേക്ക് ചേക്കേറണം.അതല്ലെങ്കിൽ ബാഴ്‌സയിലേക്കോ റയലിലേക്കോ ചേക്കേറണം.അതുമല്ലെങ്കിൽ ഇറ്റലിയിലേക്കെങ്കിലും കൂടുമാറണം ” അനൽക്കെ പറഞ്ഞു.