പിഎസ്ജിയുടെ ബ്രസീലിയൻ സൂപ്പർതാരത്തിന് പരിക്ക്!

വരുന്ന ഖത്തർ വേൾഡ് കപ്പിനുള്ള തയ്യാറെടുപ്പുകൾ ലാറ്റിനമേരിക്കൻ വമ്പന്മാരായ ബ്രസീൽ ആരംഭിച്ചു കഴിഞ്ഞിട്ടുണ്ട്. വേൾഡ് കപ്പിനുള്ള സ്‌ക്വാഡ് നേരത്തെ പ്രഖ്യാപിച്ചിരുന്നു.ഇറ്റലിയിലെ ടുറിനിൽ വെച്ചാണ് ബ്രസീൽ പരിശീലനം നടത്തുന്നത്.നവംബർ 19 ആം തീയതിയാണ് ബ്രസീൽ ഖത്തറിലേക്ക് എത്തുക.

എന്നാൽ ബ്രസീലിയൻ ക്യാമ്പിനെ സംബന്ധിച്ചിടത്തോളം ആശങ്ക നൽകുന്ന ഒരു വാർത്തയാണ് ഇന്നലെ പുറത്തു വന്നിട്ടുള്ളത്.പിഎസ്ജിയുടെ ബ്രസീലിയൻ സൂപ്പർ താരമായ മാർക്കിഞ്ഞോസ്‌ പരിക്കിന്റെ പിടിയിലാണ്.പിഎസ്ജി തന്നെയാണ് ഇക്കാര്യം അറിയിച്ചിട്ടുള്ളത്.താരത്തിന്റെ മസിലിനാണ് അസ്വസ്ഥതകൾ രേഖപ്പെടുത്തപ്പെട്ടിട്ടുള്ളത്.

ഇന്ന് പിഎസ്ജി ലീഗ് വണ്ണിൽ ഓക്സെറെക്കെതിരെ ഒരു മത്സരം കളിക്കുന്നുണ്ട്. ഈ മത്സരത്തിൽ മാർക്കിഞ്ഞോസ്‌ കളിക്കില്ല എന്നുള്ള കാര്യം ഉറപ്പായിട്ടുണ്ട്.എന്നാൽ താരത്തിന്റെ പരിക്ക് എത്രത്തോളം സീരിയസാണ് എന്നുള്ളത് പിഎസ്ജി വ്യക്തമാക്കിയിട്ടില്ല.വേൾഡ് കപ്പിനെ ബാധിക്കുമോ എന്നുള്ളതും അറിവില്ലാത്ത കാര്യമാണ്.

വരുന്ന തിങ്കളാഴ്ച മാർക്കിഞ്ഞോസ്‌ ബ്രസീലിന്റെ ക്യാമ്പിൽ ജോയിൻ ചെയ്യുമെന്നാണ് പ്രതീക്ഷിക്കപ്പെടുന്നത്. ബ്രസീലിന്റെ ഏറ്റവും പ്രധാനപ്പെട്ട താരങ്ങളിൽ ഒരാളാണ് മാർക്കിഞ്ഞോസ്‌.പക്ഷേ വേൾഡ് കപ്പിന് അദ്ദേഹം സജ്ജമാവും എന്ന് തന്നെയാണ് പ്രതീക്ഷിക്കപ്പെടുന്നത്. നവംബർ 25 ആം തീയതി സെർബിയക്കെതിരെയാണ് ബ്രസീൽ വേൾഡ് കപ്പിലെ ആദ്യ മത്സരം കളിക്കുക.