പിഎസ്ജിയിൽ നെയ്മറെയും ഡി മരിയയെയും കാത്തിരിക്കുന്നത് മറ്റൊരു നേട്ടം!

കഴിഞ്ഞ ലില്ലിക്കെതിരെ നടന്ന മത്സരത്തിൽ മിന്നുന്ന പ്രകടനമായിരുന്നു പിഎസ്ജിക്ക് വേണ്ടി സൂപ്പർ താരം എയ്ഞ്ചൽ ഡി മരിയ കാഴ്ച്ചവെച്ചിരുന്നത്. മത്സരത്തിൽ ഒരു ഗോളും ഒരു അസിസ്റ്റും താരം സ്വന്തമാക്കിയിരുന്നു.ആ ഗോളോട് കൂടി പിഎസ്ജി ജേഴ്സിയിൽ 89 ഗോളുകൾ പൂർത്തിയാക്കാൻ ഡി മരിയക്ക്‌ സാധിച്ചിട്ടുണ്ട്.ഇതോടെ പിഎസ്ജിക്ക് വേണ്ടി ഏറ്റവും കൂടുതൽ ഗോളുകൾ നേടിയ താരങ്ങളുടെ പട്ടികയിൽ എട്ടാം സ്ഥാനത്താണ് നിലവിൽ ഡി മരിയയുള്ളത്.

ഇനി 11 ഗോളുകൾ കൂടി നേടിയാൽ പിഎസ്ജി കരിയറിൽ 100 ഗോളുകൾ പൂർത്തിയാക്കാൻ ഡി മരിയക്ക്‌ സാധിക്കും. കിലിയൻ എംബപ്പേ, എഡിൻസൻ കവാനി എന്നിവരൊക്കെ ഈ നേട്ടം കൈവരിച്ചവരാണ്.അതേസമയം ഇതേ നേട്ടം തന്നെയാണ് നെയ്മർ ജൂനിയറെയും കാത്തിരിക്കുന്നത്. പിഎസ്ജിക്ക് വേണ്ടി നെയ്മർ ആകെ 88 ഗോളുകളാണ് നേടിയിട്ടുള്ളത്.ഇനി 12 ഗോളുകൾ കൂടി നേടിയാൽ നെയ്മർക്ക്‌ 100 ഗോളിൽ എത്താം. നിലവിൽ ഡി മരിയക്ക്‌ തൊട്ട് പിറകിലാണ് നെയ്മർ ഉള്ളത്.

എന്നാൽ ഈ സീസണിൽ മികച്ച രൂപത്തിൽ തുടങ്ങാൻ നെയ്മർക്ക്‌ സാധിച്ചിട്ടില്ല. കേവലം ഒരു ഗോൾ മാത്രമാണ് നെയ്മർ ഈ സീസണിൽ നേടിയിട്ടുള്ളത്. ഇനി പിഎസ്ജിയുടെ അടുത്ത മത്സരം ആർബി ലീപ്സിഗിനെതിരെയാണ്. ഈ മത്സരത്തിൽ നെയ്മറും ഡി മരിയയുമൊക്കെ ഇറങ്ങുമെന്നാണ് പ്രതീക്ഷിക്കുന്നത്.