നെയ്മറെ PSG ഒഴിവാക്കുമെന്ന് തോന്നുന്നില്ല,ഒഴിവാക്കിയാലും ഒരു പ്രശ്‌നവുമില്ല : റൊണാൾഡോ!

സൂപ്പർ താരം നെയ്മർ ജൂനിയറെ പിഎസ്ജി ഈ സമ്മർ ട്രാൻസ്ഫർ ജാലകത്തിൽ ഒഴിവാക്കാൻ തീരുമാനിച്ചു എന്നുള്ളത് ഫുട്ബോൾ ലോകത്തെ ഒട്ടുമിക്ക പ്രമുഖ മാധ്യമങ്ങളും റിപ്പോർട്ട് ചെയ്തിരുന്നു. എന്നാൽ ഈ ട്രാൻസ്ഫർ അഭ്യൂഹങ്ങളിൽ കാര്യമായ പുരോഗതിയൊന്നും ഇതുവരെ രേഖപ്പെടുത്തിയിട്ടില്ല. നെയ്മറെ മറ്റു പല ക്ലബ്ബുകളുമായി ബന്ധപ്പെടുത്തി വാർത്തകൾ ഉണ്ടെങ്കിലും ഔദ്യോഗികമായ സ്ഥിരീകരണങ്ങളൊന്നും ഇതുവരെ ലഭിച്ചിട്ടില്ല.

ഏതായാലും ബ്രസീലിയൻ ഇതിഹാസമായ റൊണാൾഡോ നസാരിയോ ഇതുമായി ബന്ധപ്പെട്ട തന്റെ അഭിപ്രായം പങ്കുവെച്ചിട്ടുണ്ട്. അതായത് നെയ്മറെ പിഎസ്ജി ഒഴിവാക്കുമെന്ന് തോന്നുന്നില്ലെന്നും ഇനി ഒഴിവാക്കിയാൽ തന്നെ പുതിയ ക്ലബ്ബ് കണ്ടെത്തുക എന്നുള്ളത് നെയ്മറെ സംബന്ധിച്ചിടത്തോളം ബുദ്ധിമുട്ടുള്ള ഒരു കാര്യമാവില്ല എന്നുമാണ് റൊണാൾഡോ പറഞ്ഞിട്ടുള്ളത്. കഴിഞ്ഞ ദിവസം ഒ ഡിയ എന്ന മാധ്യമത്തോടെ സംസാരിക്കുകയായിരുന്നു ബ്രസീലിയൻ ഇതിഹാസം. അദ്ദേഹത്തിന്റെ വാക്കുകൾ ഇങ്ങനെയാണ്.

” നെയ്മറുടെ കാര്യത്തിൽ എന്താണ് സംഭവിക്കുന്നത് എന്നുള്ളത് എനിക്ക് കൃത്യമായി അറിയില്ല. പക്ഷേ പിഎസ്ജി അദ്ദേഹത്തെ ഒഴിവാക്കുമെന്ന് ഞാൻ വിശ്വസിക്കുന്നില്ല. പക്ഷേ നെയ്മർ ഒരു സൂപ്പർ താരമാണ്. അദ്ദേഹത്തെ സംബന്ധിച്ചിടത്തോളം ഒരു പുതിയ ക്ലബ്ബ് കണ്ടെത്തുക എന്നുള്ളത് പ്രശ്നമുള്ള കാര്യമാവില്ല ” ഇതാണ് റൊണാൾഡോ പറഞ്ഞിട്ടുള്ളത്.

നെയ്മറെ ചെൽസിയുമായി ബന്ധപ്പെടുത്തി കൊണ്ടുള്ള വാർത്തകൾ സജീവമാണ്.നെയ്മറുടെ പ്രതിനിധി ചെൽസിയുമായി ബന്ധപ്പെട്ടെന്നും അറിയാൻ സാധിക്കുന്നുണ്ട്.