നെയ്മറും എംബപ്പേയും തിളങ്ങി, പിഎസ്ജിക്ക് വിജയം!

ഇന്നലെ ലീഗ് വണ്ണിൽ നടന്ന മത്സരത്തിൽ കരുത്തരായ പിഎസ്ജി വിജയം നേടി. രണ്ടിനെതിരെ മൂന്ന് ഗോളുകൾക്ക്‌ ബോർഡെക്സിനെയാണ് പിഎസ്ജി പരാജയപ്പെടുത്തിയത്. ഇരട്ടഗോളുകൾ നേടിയ സുപ്പർ താരം നെയ്മർ ജൂനിയറാണ് പിഎസ്ജിയുടെ വിജയശില്പി.ഒരു ഗോളും രണ്ടു അസിസ്റ്റുമായി കിലിയൻ എംബപ്പെയും വിജയത്തിൽ നിർണായക പങ്കു വഹിച്ചു.ജയത്തോടെ പിഎസ്ജി പോയിന്റ് ടേബിളിൽ ഒന്നാമതാണ്.13 മത്സരങ്ങളിൽ നിന്ന് 34 പോയിന്റാണ് പിഎസ്ജിയുടെ സമ്പാദ്യം.

പരിക്കേറ്റ സൂപ്പർ താരം ലയണൽ മെസ്സിയുടെ അഭാവത്തിലാണ് പിഎസ്ജി ഇന്നലെ ഇറങ്ങിയത്.മത്സരത്തിന്റെ 26-ആം മിനുട്ടിൽ കിലിയൻ എംബപ്പേയുടെ അസിസ്റ്റിൽ നിന്ന് നെയ്മർ ജൂനിയറാണ് ഗോൾ നേടിയത്.43-ആം മിനുട്ടിൽ നെയ്മർ വീണ്ടും വല കുലുക്കി.ഇത്തവണയും എംബപ്പേയായിരുന്നു അസിസ്റ്റ്.63-ആം മിനുട്ടിലാണ് എംബപ്പേയുടെ ഗോൾ വന്നത്.വൈനാൾഡമായിരുന്നു അസിസ്റ്റ് നൽകിയത്.78-ആം മിനുട്ടിൽ എലിസിലൂടെയും 92-ആം മിനുട്ടിൽ നിയാങ്ങിലൂടെയും ബോർഡെക്സ് തിരിച്ചടിച്ചുവെങ്കിലും വിജയിക്കാൻ പ്രാപ്തമായിരുന്നില്ല.