ട്വിസ്റ്റ് ഉണ്ടാവുമോ?റയലിന്റെ ഏത് തരംതാഴ്ന്ന ഓഫറും സ്വീകരിക്കാൻ തയ്യാറായി പിഎസ്ജി!

പിഎസ്ജിയുടെ ഫ്രഞ്ച് സൂപ്പർ താരമായ കിലിയൻ എംബപ്പേയുടെ ക്ലബ്ബുമായുള്ള കോൺട്രാക്ട് അടുത്ത സമ്മറിലാണ് അവസാനിക്കുക.ഇത് ഒരു വർഷത്തേക്ക് കൂടി പുതുക്കാനുള്ള അവസരം എംബപ്പേക്കുണ്ട്.ആ ഓപ്ഷൻ ഇന്നത്തോടുകൂടി അവസാനിക്കുകയാണ്.അതായത് എംബപ്പേ നാളെ അഥവാ ഓഗസ്റ്റ് ഒന്നിന് പിഎസ്ജി താരമാണെങ്കിൽ ക്ലബ്ബിൽ നിന്നും 60 മില്യൺ യൂറോ ലോയൽറ്റി ബോണസായി കൊണ്ട് താരത്തിന് ലഭിക്കും. അത് പിഎസ്ജിയെ സംബന്ധിച്ചിടത്തോളം വളരെയധികം ബുദ്ധിമുട്ടുണ്ടാക്കുന്ന ഒരു കാര്യമാണ്.

അതുകൊണ്ടുതന്നെ വളരെ വേഗത്തിൽ മറ്റൊരു ക്ലബ്ബുമായി എംബപ്പേയുടെ കാര്യത്തിൽ കരാറിൽ എത്താനാണ് പിഎസ്ജി ഇപ്പോൾ ശ്രമിക്കുന്നത്.അൽ ഹിലാൽ വലിയ ഓഫർ നൽകിയിരുന്നു. അത് പിഎസ്ജി സ്വീകരിക്കുകയും ചെയ്തിരുന്നു.എന്നാൽ എംബപ്പേ അത് തള്ളിക്കളഞ്ഞു.എംബപ്പേ പോകാൻ ഉദ്ദേശിക്കുന്ന റയൽ മാഡ്രിഡ് ഇതുവരെ ഓഫറുകൾ ഒന്നും നൽകാത്തത് പിഎസ്ജിക്ക് വലിയ നിരാശ ഉണ്ടാക്കുന്ന കാര്യമാണ്.

പക്ഷേ അവസാന നിമിഷങ്ങളിൽ പിഎസ്ജി ഒരു ട്വിസ്റ്റ് പ്രതീക്ഷിക്കുന്നുണ്ട്. അതായത് റയൽ മാഡ്രിഡ് ഒരു തരംതാഴ്ന്ന ഓഫർ ചിലപ്പോൾ നൽകിയേക്കാം എന്ന പ്രതീക്ഷയിലാണ് നിലവിൽ പിഎസ്ജിയുള്ളത്.എംബപ്പേക്ക് വേണ്ടി വളരെ ചെറിയ ഒരു ഓഫറെങ്കിലും റയൽ മാഡ്രിഡ് നൽകുമോ എന്നുള്ളതാണ് ഇപ്പോൾ പിഎസ്ജി ഉറ്റുനോക്കുന്നത്. അങ്ങനെ റയൽ എത്ര ചെറിയ ഓഫറാണ് നൽകുന്നതെങ്കിലും അത് സ്വീകരിക്കാൻ പിഎസ്ജി തയ്യാറായിക്കഴിഞ്ഞിട്ടുണ്ട്. പ്രമുഖ ഫ്രഞ്ച് മാധ്യമമായ RMC സ്പോർട്ടാണ് ഇക്കാര്യം റിപ്പോർട്ട് ചെയ്തിരിക്കുന്നത്.

റയൽ മാഡ്രിഡ് ഓഫർ നൽകാൻ തയ്യാറാകുമോ എന്നുള്ളത് മറ്റൊരു ചോദ്യമാണ്. കഴിഞ്ഞ എൽ ക്ലാസിക്കോ മത്സരത്തിൽ പരാജയപ്പെട്ടതോടെ എംബപ്പേയെ കൊണ്ടുവരണമെന്നുള്ള ആവശ്യം വളരെയധികം ഉയർന്നു കേട്ടിരുന്നു. ഇംഗ്ലീഷ് പ്രീമിയർ ലീഗ് ക്ലബ്ബുകൾ താരത്തിൽ താൽപര്യം പ്രകടിപ്പിച്ചിട്ടുണ്ടെങ്കിലും നിലവിൽ എംബപ്പേ റയൽ മാഡ്രിഡിനെ മാത്രമാണ് പരിഗണിക്കുന്നത്.