ഞങ്ങൾ വ്യത്യസ്തരാണ്,ഏത് പ്രതിസന്ധിയും അതിജീവിക്കും : എംബപ്പേ പറയുന്നു

ഇന്നലെ ലീഗ് വണ്ണിൽ നടന്ന മത്സരത്തിൽ അവസാന നിമിഷമാണ് പിഎസ്ജി വിജയം പിടിച്ചു വാങ്ങിയത്. ഒരു ഘട്ടത്തിൽ രണ്ട് ഗോളുകളുടെ ലീഡ് എടുത്തുകൊണ്ട് പിഎസ്ജി അനായാസ വിജയം നേടുമെന്ന് പ്രതീക്ഷിച്ചിരുന്നു. പക്ഷേ പിഎസ്ജിയെ ഞെട്ടിച്ചുകൊണ്ട് എതിരാളികളായ ലില്ലി മൂന്ന് ഗോളുകൾ തിരിച്ചടിക്കുകയായിരുന്നു.ഇതോട് കൂടി പിഎസ്ജി പ്രതിസന്ധിയിലാവുകയായിരുന്നു.

എന്നാൽ ആ പ്രതിസന്ധിയെ അതിജീവിക്കാൻ പിഎസ്ജിക്ക് സാധിച്ചിട്ടുണ്ട്. സൂപ്പർ താരങ്ങളായ കിലിയൻ എംബപ്പേയും ലയണൽ മെസ്സിയും ഗോൾ നേടിയതോടുകൂടി പിഎസ്ജി വിജയം സ്വന്തമാക്കുകയായിരുന്നു.തുടർച്ചയായ മൂന്ന് മത്സരങ്ങൾ പരാജയപ്പെട്ടതിന് ശേഷമാണ് പിഎസ്ജി വിജയം കരസ്ഥമാക്കുന്നത്.

ഇതേക്കുറിച്ച് സൂപ്പർ താരമായ കിലിയൻ എംബപ്പേ ചില കാര്യങ്ങൾ പറഞ്ഞിട്ടുണ്ട്. അതായത് പിഎസ്ജി വ്യത്യസ്തമായ ഒരു ടീമാണെന്നും ഏതൊരു പ്രതിസന്ധിഘട്ടത്തെയും മറികടക്കാൻ പിഎസ്ജിക്ക് സാധിക്കുമെന്നുമാണ് എംബപ്പേ പറഞ്ഞിട്ടുള്ളത്.അദ്ദേഹത്തിന്റെ വാക്കുകൾ ഇങ്ങനെയാണ്.

” ഈ മത്സരം ഞങ്ങളുടെ മികച്ച മത്സരമായിരുന്നില്ല. ഒരുപാട് പിഴവുകൾ ഞങ്ങൾ വരുത്തിവച്ചു. ഒരു മികച്ച ടീമിനെതിരെ കളിക്കുമ്പോൾ തീർച്ചയായും ശ്രദ്ധ പുലർത്തണമായിരുന്നു.പക്ഷേ ശ്രദ്ധക്കുറവ് ഈ മത്സരത്തിൽ ഞങ്ങളെ ബാധിച്ചു. എന്നിരുന്നാലും ഞങ്ങൾക്ക് ഈ മത്സരത്തെ അതിജീവിക്കാൻ കഴിഞ്ഞു. ഞങ്ങൾക്ക് മികച്ച പ്രകടനം കാഴ്ചവെക്കാൻ കഴിഞ്ഞിട്ടില്ലെങ്കിലും, കാര്യങ്ങളൊക്കെ അനുകൂലം അല്ലെങ്കിലും മത്സരത്തെ അതിജീവിക്കാൻ കഴിയും എന്നുള്ളത് ഞങ്ങൾ ഇന്ന് തെളിയിച്ചു.ഞങ്ങൾ വ്യത്യസ്തമായ ഒരു ടീമാണ്.ഞങ്ങൾക്ക് വ്യത്യസ്തങ്ങളായ താരങ്ങളാണ് ഉള്ളത്.ഇത്തരം സാഹചര്യങ്ങളെ മറികടന്ന് മുന്നോട്ടു പോകാൻ ഞങ്ങൾക്ക് സാധിക്കും ” എംബപ്പേ പറഞ്ഞു.

തകർപ്പൻ പ്രകടനമാണ് ഇന്നലത്തെ മത്സരത്തിൽ എംബപ്പേ നടത്തിയത്.വളരെ നിർണായകമായ രണ്ടു ഗോളുകൾ ആണ് അദ്ദേഹം മത്സരത്തിൽ നേടിയത്.