ഞങ്ങളുടെ കാര്യത്തിൽ PSG തീരുമാനമെടുക്കും : നവാസ് പുറത്തേക്കെന്ന സൂചന നൽകി ഡോണ്ണാരുമ!

ഈ സീസണിലായിരുന്നു എസി മിലാന്റെ ഇറ്റാലിയൻ ഗോൾകീപ്പറായ ജിയാൻ ലൂയിജി ഡോണ്ണാരുമ പിഎസ്ജിയിൽ എത്തിയത്. എന്നാൽ നല്ലൊരു തുടക്കമല്ല അദ്ദേഹത്തിന് ആദ്യ സീസണിൽ ലഭിച്ചിരിക്കുന്നത്. പകുതി മത്സരങ്ങൾ മാത്രമേ അദ്ദേഹത്തിന് കളിക്കാൻ കഴിഞ്ഞിട്ടുള്ളൂ. മാത്രമല്ല റയലിനെതിരെയുള്ള ചാമ്പ്യൻസ് ലീഗ് മത്സരത്തിൽ വരുത്തിയ പിഴവിന് വലിയ രൂപത്തിലുള്ള വിമർശനങ്ങൾ അദ്ദേഹത്തിന് ഏൽക്കേണ്ടി വരികയും ചെയ്തിരുന്നു.

ഏതായാലും കഴിഞ്ഞ ദിവസം നൽകിയ അഭിമുഖത്തിൽ ചില കാര്യങ്ങൾ ഡോണ്ണാരുമ പങ്കുവെച്ചിട്ടുണ്ട്. അതായത് അടുത്ത സീസണിൽ നവാസിനും തനിക്കുമിടയിൽ കോമ്പിറ്റീഷൻ ഉണ്ടാവില്ലെന്നും തങ്ങളുടെ കാര്യത്തിൽ PSG ഒരു തീരുമാനമെടുത്തേക്കുമെന്നുമാണ് ഡോണ്ണാരുമ പറഞ്ഞിട്ടുള്ളത്.നവാസ് അടുത്ത സീസണിൽ ഉണ്ടാവില്ല എന്ന് തന്നെയാണ് ഇദ്ദേഹം പറഞ്ഞു വെക്കുന്നത്.ഡോണ്ണാരുമയുടെ വാക്കുകൾ ഇങ്ങനെയാണ്.

” എന്നെ സംബന്ധിച്ചിടത്തോളം ഇതൊരു എളുപ്പമുള്ള സീസണായിരുന്നില്ല. എനിക്കിയും കൂടുതൽ ചെയ്യാനാവുമെന്നുള്ളത് എനിക്കറിയാം. ഈ സീസണിലെ പകുതി മത്സരങ്ങൾ മാത്രമാണ് എനിക്ക് കളിക്കാൻ സാധിച്ചിട്ടുള്ളത്. അതുകൊണ്ടുതന്നെ എന്റെ ഏറ്റവും മികച്ച പ്രകടനം പുറത്തെടുക്കാൻ എനിക്ക് കഴിഞ്ഞിട്ടില്ല. പക്ഷേ ഈ ക്ലബ്ബിന് വേണ്ടി കൂടുതൽ ചെയ്യാൻ കഴിയുമെന്നുള്ള കാര്യത്തിൽ എനിക്ക് സംശയമില്ല. അടുത്ത സീസണിൽ ഗോൾകീപ്പർ സ്ഥാനത്തിന് വേണ്ടി ഒരു കോമ്പിറ്റീഷൻ ഉണ്ടാവുമെന്ന് ഞാൻ കരുതുന്നില്ല. ഞങ്ങളുടെ കാര്യത്തിൽ ക്ലബ്ബ് ഒരു തീരുമാനം കൈക്കൊള്ളും. എനിക്ക് നവാസുമായി നല്ല ബന്ധമാണുള്ളത്. ഞങ്ങൾ രണ്ടുപേരും നല്ല സുഹൃത്തുക്കളാണ്. ഞങ്ങൾക്ക് ഈ സാഹചര്യം മനസ്സിലാകും. പക്ഷേ ഇത് അദ്ദേഹത്തിനും ബുദ്ധിമുട്ടാണ് ” ഇതാണ് ഡോണ്ണാരുമ പറഞ്ഞിട്ടുള്ളത്.

16 മത്സരങ്ങളാണ് ഈ ലീഗ് വണ്ണിൽ ഡോണ്ണാരുമ കളിച്ചിട്ടുള്ളത്. നാല് ക്ലീൻ ഷീറ്റുകൾ അദ്ദേഹം കരസ്ഥമാക്കിയിട്ടുണ്ട്.