എംബാപ്പെയോടൊപ്പം കളിക്കുക എന്നുള്ളത് ഒരു സ്വപ്നം, താരത്തെ പ്രശംസകൾ കൊണ്ട് മൂടി ഡേവിഡ് ബെക്കാം !

ഫുട്ബോൾ ലോകത്തെ സൂപ്പർ താരങ്ങളിൽ ഒരാളാണ് ഡേവിഡ് ബെക്കാമെന്ന കാര്യത്തിൽ ആർക്കും സംശയം കാണില്ല. ഇംഗ്ലണ്ടിന് വേണ്ടിയും മാഞ്ചസ്റ്റർ യുണൈറ്റഡിന് വേണ്ടിയും റയൽ മാഡ്രിഡിന് വേണ്ടിയും ഒട്ടേറെ വിസ്മയമുഹൂർത്തങ്ങൾ സമ്മാനിച്ചിട്ടുള്ള താരമാണ് ബെക്കാം. വലിയ തോതിൽ ആരാധകപിന്തുണയും ബെക്കാമിനുണ്ടായിരുന്നു. ഇന്ന് എംഎൽഎസ് ക്ലബായ ഇന്റർമിയാമിയുടെ ഉടമസ്ഥൻ കൂടിയാണ് ബെക്കാം.

എന്നാൽ ഈ ബെക്കാം തന്റെ ഇപ്പോഴത്തെ ആഗ്രഹം വെളിപ്പെടുത്തിയിരിക്കുകയാണ്. താൻ ഇപ്പോഴും കളിക്കളത്തിൽ ഉണ്ടായിരുന്നുവെങ്കിൽ സൂപ്പർ താരം കിലിയൻ എംബാപ്പെയോടൊപ്പം കളിക്കുക എന്നുള്ളതായിരിക്കും തന്റെ സ്വപ്നമെന്ന് എന്നാണ് ബെക്കാം വെളിപ്പെടുത്തിയിരിക്കുന്നത്. താരത്തിന്റെ മുമ്പിൽ എവിടെക്ക്‌ വേണമെങ്കിലും ബോൾ ഇട്ടുനൽകിയാലും അത്‌ പിടിച്ചെടുക്കാൻ താരത്തിന് കഴിയുമെന്നും ബെക്കാം കൂട്ടിച്ചേർത്തു. 2013-ൽ പിഎസ്ജിക്ക്‌ വേണ്ടി കുറച്ചു മത്സരങ്ങൾ കളിക്കാൻ ബെക്കാമിന് സാധിച്ചിരുന്നു.

” ഞാൻ ഇപ്പോഴും ഒരു താരമായിരിക്കാൻ ഇഷ്ടപ്പെടുന്നുണ്ട്. എന്തെന്നാൽ കിലിയൻ എംബാപ്പെയോടൊപ്പം കളിക്കുക എന്നുള്ളത് എന്റെയൊരു സ്വപ്നമാണ്. അദ്ദേഹത്തിന്റെ മുമ്പിൽ എവിടെക്ക്‌ വേണമെങ്കിലും നിങ്ങൾക്ക്‌ പന്ത്‌ ഇട്ടുനൽകാം. എന്തെന്നാൽ അദ്ദേഹം അത്‌ എടുത്തിരിക്കും. ഞാൻ മുമ്പ് തന്നെ ഒരുപാട് തവണ അദ്ദേഹത്തെ അഭിനന്ദിച്ചിട്ടുണ്ട്. അദ്ദേഹം വളരെയധികം പ്രതിഭയുള്ള, പ്രത്യേകതയുള്ള ഒരു വ്യക്തിയാണ്. ഇത്രയും ചെറുപ്പത്തിൽ തന്നെ ഇത്രയും ഉയരങ്ങളിൽ എത്തുക എന്നുള്ളത് അദ്ദേഹത്തെ സംബന്ധിച്ചും ക്ലബ്ബിനെയും കുടുംബത്തെയും ആരാധകരെയും സംബന്ധിച്ചും പ്രത്യേകതയുള്ള കാര്യമാണ് ” ടെലിഫൂട്ടിനോട് ബെക്കാം പറഞ്ഞു.

കഴിഞ്ഞ ദിവസം പിഎസ്ജിക്ക്‌ വേണ്ടി നൂറ് ഗോളുകൾ പൂർത്തിയാക്കാൻ എംബാപ്പെക്ക്‌ കഴിഞ്ഞിരുന്നു. പിഎസ്ജിക്ക്‌ വേണ്ടി സെഞ്ച്വറി പൂർത്തിയാക്കുന്ന അഞ്ചാമത്തെ താരമാണ് എംബാപ്പെ. താരത്തെ അടുത്ത സമ്മറിൽ സ്വന്തമാക്കാൻ ലിവർപൂൾ, റയൽ മാഡ്രിഡ്‌ എന്നിവർ മുൻപന്തിയിലുണ്ട്.