എംബപ്പേയെ ആവിശ്യമുണ്ട്, ഞാൻ ആവേശത്തോട് കൂടി കാത്തിരിക്കുകയാണ് :റോഡ്രിഗോ പറയുന്നു!

സൂപ്പർ താരം കിലിയൻ എംബപ്പേ റയൽ മാഡ്രിഡിൽ എത്താൻ വളരെയധികം സാധ്യതകളുള്ള ഒരു സാഹചര്യമാണ് ഇപ്പോഴുള്ളത്. എന്തെന്നാൽ തനിക്ക് കരാർ പുതുക്കാൻ താല്പര്യമില്ല എന്ന കാര്യം എംബപ്പേ പിഎസ്ജിയെ അറിയിച്ചിട്ടുണ്ട്. അതുകൊണ്ടുതന്നെ താരത്തെ വിൽക്കാൻ പിഎസ്ജി തീരുമാനിക്കുകയും ചെയ്തിട്ടുണ്ട്. ഈ സമ്മർ ട്രാൻസ്ഫർ ജാലകത്തിൽ എംബപ്പേക്ക് വേണ്ടി ലഭിക്കുന്ന ഓഫറുകൾ പരിഗണിക്കാനാണ് പിഎസ്ജിയുടെ തീരുമാനം.

റയൽ മാഡ്രിഡ് ഇതുവരെ ഓഫറുകൾ ഒന്നും നൽകിയിട്ടില്ലെങ്കിലും എംബപ്പേ സ്വന്തമാക്കാൻ അവർക്ക് താല്പര്യമുണ്ട്. റയലിന്റെ ബ്രസീലിയൻ സൂപ്പർ താരമായ റോഡ്രിഗോയും ഇക്കാര്യം തുറന്നു പറഞ്ഞിട്ടുണ്ട്. നമ്പർ 10 പൊസിഷനിലേക്ക് എംബപ്പേയെ തങ്ങൾക്ക് ആവശ്യമുണ്ടെന്നും അദ്ദേഹത്തെ താൻ വളരെ ആവേശത്തോടെ കൂടി കാത്തിരിക്കുകയാണ് എന്നുമാണ് റോഡ്രിഗോ പറഞ്ഞിട്ടുള്ളത്. താരത്തിന്റെ വാക്കുകളെ മാർക്ക റിപ്പോർട്ട് ചെയ്യുന്നത് ഇങ്ങനെയാണ്.

“എന്റെ ആവേശവും ആകാംക്ഷയും അതിന്റെ ഏറ്റവും ഉയരത്തിലാണ്. കാരണം എംബപ്പേ ഒരു അത്ഭുതപ്രതിഭാസമാണ്.ലോകത്തിലെ ഏറ്റവും മികച്ച താരങ്ങളിൽ ഒരാളാണ് അദ്ദേഹം.ആ നമ്പർ 10 പൊസിഷനിൽ ഞങ്ങൾക്ക് ഒരു താരത്തെ ആവശ്യമുണ്ട് എന്നുള്ളത് ഞങ്ങൾക്ക് തന്നെ അറിയാം.എംബപ്പേ വരുന്നതിനെ ഞാൻ ആവേശത്തോടെ കൂടി കാത്തിരിക്കുകയാണ്. പക്ഷേ അദ്ദേഹത്തിന് പാരീസുമായി കോൺട്രാക്ട് ഉണ്ട്. അതിനെ ഞങ്ങൾ ബഹുമാനിക്കേണ്ടതുണ്ട്. അദ്ദേഹം വരുമെന്ന് തന്നെയാണ് ഞാൻ പ്രതീക്ഷിക്കുന്നത്.പക്ഷേ എംബപ്പേക്ക് ഇപ്പോൾ വരാൻ സാധിച്ചിട്ടില്ലെങ്കിലും റയലിൽ താരങ്ങൾ ഉണ്ട്.പെരസും ആഞ്ചലോട്ടിയും റയലിന് ഗുണകരമാകുന്ന ഏറ്റവും മികച്ച തീരുമാനം തന്നെ എടുക്കും ” ഇതാണ് റോഡ്രിഗോ പറഞ്ഞിട്ടുള്ളത്.

മുന്നേറ്റ നിരയിലെ നിരവധി താരങ്ങൾ റയലിനോട് വിട പറഞ്ഞിരുന്നു.കരിം ബെൻസിമ,ഈഡൻ ഹസാർഡ്,മരിയാനോ,അസെൻസിയോ എന്നിവരൊന്നും ഇപ്പോൾ റയൽ മാഡ്രിഡിൽ ഇല്ല. അതുകൊണ്ടുതന്നെ ഈ താരങ്ങളുടെ സ്ഥാനത്തേക്ക് ഒക്കെ പകരക്കാരെ റയലിന് അത്യാവശ്യമാണ്.