എംബപ്പെ ക്ലബ് വിട്ടാൽ മറ്റൊരു താരത്തെ കൂടി കണ്ടു വെച്ച് പിഎസ്ജി!

സൂപ്പർ താരം കിലിയൻ എംബപ്പെ ഈ സീസണിന് ശേഷം പിഎസ്ജിയിൽ തുടരുമോ ഇല്ലയോ എന്നുള്ളത് അവ്യക്തമായ ഒരു കാര്യമാണ്.താരത്തിന്റെ കരാർ പുതുക്കാനുള്ള ശ്രമങ്ങൾ പിഎസ്ജി നടത്തുന്നുണ്ട്.എന്നാൽ താരം ക്ലബ്ബ് വിടുകയാണെങ്കിലുള്ള മുൻകരുതലുകളും ഇപ്പോൾ തന്നെ പിഎസ്ജി കൈക്കൊണ്ടിട്ടുണ്ട്.

എംബപ്പെ ക്ലബ് വിട്ടാൽ ആ സ്ഥാനത്തേക്ക് നിരവധി താരങ്ങൾ പിഎസ്ജി കണ്ടുവെച്ചിട്ടുണ്ട്. ക്രിസ്റ്റഫർ എങ്കുങ്കു,റിച്ചാർലീസൺ എന്നിവർ അതിൽ പെട്ടവരാണ്. ഇപ്പോഴിതാ ബെൻഫിക്കയുടെ ഉറുഗ്വൻ സൂപ്പർതാരമായ ഡാർവിൻ നുനെസിനെയും പിഎസ്ജി പരിഗണിക്കുന്നുണ്ട്. പ്രമുഖ മാധ്യമമായ അത്ലറ്റിക്കാണ് ഇക്കാര്യം റിപ്പോർട്ട് ചെയ്തിട്ടുള്ളത്.

22-കാരനായ താരം ഈ സീസണിൽ മിന്നുന്ന ഫോമിലാണ് ഇപ്പോൾ കളിച്ചു കൊണ്ടിരിക്കുന്നത്.31 ഗോളുകളാണ് ഈ സീസണിൽ നേടിയിട്ടുള്ളത്.ബെൻഫികയുമായുള്ള അദ്ദേഹത്തിന്റെ കരാർ 2025-ലാണ് അവസാനിക്കുക.70 മില്യൺ യൂറോയാണ് താരത്തിന്റെ മൂല്യമായി കണക്കാക്കുന്നത്.

അതേസമയം താരത്തെ സ്വന്തമാക്കുക എന്നുള്ളത് പിഎസ്ജിക്ക് എളുപ്പമാവില്ല. വമ്പൻമാരായ മാഞ്ചസ്റ്റർ യുണൈറ്റഡും ചെൽസിയും താരത്തിൽ താൽപര്യം പ്രകടിപ്പിച്ചിട്ടുണ്ട്.കൂടാതെ ലിയോൺ,റെന്നസ് എന്നിവർക്കും നുനസിൽ താല്പര്യമുണ്ട്. ഏതായാലും താരത്തെ സ്വന്തമാക്കാൻ പിഎസ്ജിക്ക് കഴിയുമോ എന്നുള്ളത് കാത്തിരുന്ന് കാണേണ്ട കാര്യമാണ്.