ആഴ്സണൽ നേടിയത് അർഹിച്ച വിജയം: പോരായ്മകൾ തുറന്നുപറഞ്ഞ് പിഎസ്ജി പരിശീലകൻ!
ഇന്നലെ യുവേഫ ചാമ്പ്യൻസ് ലീഗിൽ നടന്ന മത്സരത്തിൽ ഫ്രഞ്ച് വമ്പൻമാരായ പിഎസ്ജിക്ക് തോൽവി ഏറ്റുവാങ്ങേണ്ടി വന്നിരുന്നു. എതിരില്ലാത്ത രണ്ട് ഗോളുകൾക്കാണ് ഇംഗ്ലീഷ് കരുത്തരായ ആഴ്സണൽ പിഎസ്ജിയെ പരാജയപ്പെടുത്തിയത്.കായ് ഹാവർട്സ്,ബുകയോ സാക്ക എന്നിവരാണ് ആഴ്സണലിന് വേണ്ടി ഗോളുകൾ നേടിയത്.ആഴ്സണലിന്റെ മൈതാനത്ത് വെച്ച് നടന്ന മത്സരത്തിൽ മികച്ച പ്രകടനം നടത്തിയത് ആഴ്സണൽ തന്നെയാണ്.
പിഎസ്ജിയുടെ പരിശീലകനായ ലൂയിസ് എൻറിക്കെ ഈ തോൽവിയുടെ ഉത്തരവാദിത്വം ഏറ്റെടുത്തിട്ടുണ്ട്.പിഎസ്ജിയേക്കാൾ മികച്ച് നിന്നത് ആഴ്സണൽ തന്നെയാണ് എന്നുള്ള കാര്യം അദ്ദേഹം പറഞ്ഞിട്ടുണ്ട്.എതിരാളികളുടെ നിലവാരത്തിൽ നിന്നും താഴെയായിരുന്നു തങ്ങൾ എന്നും അദ്ദേഹം സമ്മതിച്ചിട്ടുണ്ട്.എൻറിക്കെയുടെ വാക്കുകൾ ഇങ്ങനെയാണ്.
” ഇത്തരം മത്സരങ്ങൾക്ക് ആവശ്യമായ ഒരു നിലവാരം ഉണ്ട്,ആ നിലവാരത്തിൽ നിന്നും വളരെ അകലെയായിരുന്നു ഞങ്ങൾ. മത്സരത്തിന്റെ പല മേഖലകളിലും ഞങ്ങളെക്കാൾ മികച്ചത് ആഴ്സണൽ തന്നെയായിരുന്നു.കളിക്കളത്തിന് അകത്ത് ഡുവലസ് വിജയിക്കാതെ ഒരു പോസിറ്റീവായ റിസൾട്ട് ഉണ്ടാക്കുക എന്നത് അസാധ്യമായ കാര്യമാണ്.ഞങ്ങളുടെ മുന്നേറ്റ നിര താരങ്ങളെ നന്നായി കൈകാര്യം ചെയ്യാൻ അവരുടെ ഡിഫൻഡർമാർക്ക് കഴിഞ്ഞു, എന്നാൽ അവരുടെ മുന്നേറ്റ നിര താരങ്ങളെ അതുപോലെ കൈകാര്യം ചെയ്യാൻ ഞങ്ങളുടെ പ്രതിരോധത്തിന് കഴിഞ്ഞില്ല.ആഴ്സണൽ തന്നെയായിരുന്നു മത്സരത്തിൽ ആധിപത്യം പുലർത്തിയത്. ഈ സീസൺ അവസാനിക്കുന്നത് വരെ നമുക്ക് കാത്തിരിക്കാം.ഞങ്ങൾ ഈ സീസണൽ കളിക്കുന്ന ഏറ്റവും ഹൈ ലെവൽ മത്സരമായിരുന്നു ഇത്.ഞങ്ങൾ എവിടേക്കാണ് എത്തേണ്ടത് എന്നതിനെക്കുറിച്ച് കൃത്യമായ ധാരണ എനിക്കുണ്ട്. പക്ഷേ എത്ര സമയം പിടിക്കും എന്നറിയില്ല ” ഇതാണ് പരിശീലകൻ പറഞ്ഞിട്ടുള്ളത്.
നിലവിൽ പോയിന്റ് പട്ടികയിൽ ആഴ്സണൽ എട്ടാം സ്ഥാനത്തും പിഎസ്ജി പതിനെട്ടാം സ്ഥാനത്തും ആണ് ഉള്ളത്. ഇനി ചാമ്പ്യൻസ് ലീഗിൽ ആഴ്സണലിന്റെ അടുത്ത എതിരാളികൾ ശാക്തർ ഡോണസ്കാണ്. അതേസമയം പിഎസ്ജി ഡച്ച് ക്ലബ്ബായ psv യെയാണ് നേരിടുക.
