ആരാധനാപാത്രവും സുഹൃത്തും : മെസ്സിയെ ലഭിച്ചതിന് ഫുട്ബോളിനോട് നന്ദി പറഞ്ഞ് നെയ്മർ!

ഫുട്ബോൾ ലോകത്തെ ഏറ്റവും വലിയ സുഹൃത്തുക്കളിൽ പെട്ടവരാണ് ലയണൽ മെസ്സിയും നെയ്മർ ജൂനിയറും. കഴിഞ്ഞ സീസണിൽ മെസ്സി പിഎസ്ജിയിലേക്ക് എത്തുന്നതിൽ സുഹൃത്തായ നെയ്മർ ജൂനിയറുടെ പങ്ക് വളരെ വലുതാണ്. എന്നാൽ കഴിഞ്ഞ സീസണിൽ വേണ്ട രൂപത്തിൽ തിളങ്ങാൻ ഇരു താരങ്ങൾക്കും പിഎസ്ജിയിൽ കഴിഞ്ഞിരുന്നില്ല.

എന്നാൽ ഈ സീസണിൽ ഗതി വേറെയാണ്. മിന്നുന്ന പ്രകടനമാണ് ലയണൽ മെസ്സിയും നെയ്മർ ജൂനിയറും ഇപ്പോൾ പുറത്തെടുക്കുന്നത്. ഈ സീസണിൽ ആകെ കളിച്ച 4 മത്സരങ്ങളിൽ നിന്ന് ഏഴ് ഗോളുകളും 6 അസിസ്റ്റുകളുമാണ് നെയ്മർ കരസ്ഥമാക്കിയിട്ടുള്ളത്. അതേസമയം ലയണൽ മെസ്സി 4 ഗോളുകളും 2 അസിസ്റ്റുകളും സ്വന്തമാക്കിയിട്ടുണ്ട്. ഇരുവർക്കും ഒപ്പം കളിക്കുന്ന എംബപ്പേയും മിന്നും ഫോമിലാണ്.

കഴിഞ്ഞ ലില്ലിക്കെതിരെയുള്ള മത്സരത്തിൽ തകർപ്പൻ പ്രകടനമാണ് പിഎസ്ജി പുറത്തെടുത്തത്. നെയ്മർ രണ്ടു ഗോളുകളും 3 അസിസ്റ്റുകളും നേടിയപ്പോൾ മെസ്സി ഒരു ഗോളും ഒരു അസിസ്റ്റും സ്വന്തമാക്കി. ഈ മത്സരത്തിനു ശേഷം നെയ്മർ ജൂനിയർ തന്റെ instagram അക്കൗണ്ടിൽ ഒരു ചിത്രം പങ്കുവെച്ചിട്ടുണ്ട്. ലയണൽ മെസ്സിക്കൊപ്പം നിൽക്കുന്ന ചിത്രമാണ് നെയ്മർ പോസ്റ്റ് ചെയ്തിട്ടുള്ളത്.

” Idol അഥവാ ആരാധനാപാത്രവും സുഹൃത്തും,നന്ദി ഫുട്ബോൾ ” ഇതായിരുന്നു നെയ്മർ കുറിച്ചിരുന്നത്. നെയ്മർ ലയണൽ മെസ്സിയെ എത്രത്തോളം ഇഷ്ടപ്പെടുന്നു എന്നുള്ളതിന്റെ തെളിവുകളാണ് ഈ വാക്കുകൾ.

ഏതായാലും വരുന്ന മത്സരങ്ങളിലും മികച്ച പ്രകടനം പുറത്തെടുക്കാനുള്ള ഒരുക്കത്തിലാണ് പിഎസ്ജിയുള്ളത്. അതിൽ ഏറ്റവും കൂടുതൽ നിർണായകമാവുക ഈ രണ്ടു താരങ്ങളുടെയും പ്രകടനം തന്നെയാണ്.