അവസാന നിമിഷവും മെസ്സിയെ കൂവി,തോൽവിയോട് സീസൺ അവസാനിപ്പിച്ച് പിഎസ്ജി!

ഇന്നലെ ലീഗ് വണ്ണിൽ നടന്ന അവസാന മത്സരത്തിൽ ചാമ്പ്യന്മാരായ പിഎസ്ജി പരാജയപ്പെട്ടു. രണ്ടിനെതിരെ മൂന്നു ഗോളുകൾക്കാണ് പിഎസ്ജി സ്വന്തം മൈതാനത്ത് ക്ലർമോന്റിനോട് തോൽവി അറിഞ്ഞത്. ഈ സീസണിലെ അവസാനത്തെ മത്സരമാണ് പിഎസ്ജി ഇപ്പോൾ പൂർത്തിയാക്കിയത്. മാത്രമല്ല സൂപ്പർ താരങ്ങളായ ലയണൽ മെസ്സിയും സെർജിയോ റാമോസും പിഎസ്ജിക്ക് വേണ്ടി കളിച്ച അവസാന മത്സരം കൂടിയായിരുന്നു ഇത്.

മത്സരത്തിന്റെ പതിനാറാം മിനിറ്റിൽ റാമോസാണ് പിഎസ്ജിക്ക് വേണ്ടി ലീഡ് നേടിയത്.ഒരു ഹെഡറിലൂടെയാണ് അവസാന മത്സരത്തിൽ താരം ഗോൾ നേടിയത്. പിന്നീട് ഇരുപത്തിയൊന്നാം മിനിറ്റിൽ എംബപ്പേ പിഎസ്ജിയുടെ ലീഡ് വർദ്ധിപ്പിച്ചു.പെനാൽറ്റിലൂടെയാണ് താരം ഗോൾ നേടിയത്. അതിനുശേഷം ക്ലർമോന്റ് അതിശക്തമായി തിരിച്ചുവരികയായിരുന്നു.

24ആം മിനുട്ടിൽ ഗാസ്റ്റീൻ,45ആം മിനുട്ടിൽ സെഫാൻ,63ആം മിനുറ്റിൽ കെയ് എന്നിവർ ക്ലർമോന്റിന് വേണ്ടി ഗോളുകൾ നേടുകയായിരുന്നു. ലഭിച്ച പെനാൽറ്റി തുലച്ചു കളഞ്ഞില്ലായിരുന്നുവെങ്കിൽ ഇതിനേക്കാൾ വലിയ വിജയം അവർക്ക് നേടാമായിരുന്നു.ഏതായാലും അവസാന മത്സരത്തിൽ തലതാഴ്ത്തി കൊണ്ടാണ് ചാമ്പ്യന്മാർ മടങ്ങുന്നത്.

പക്ഷേ പിഎസ്ജി ആരാധകരുടെ മോശം പ്രവർത്തി ഈ അവസാന മത്സരത്തിലും തുടർന്നിരുന്നു.ലയണൽ മെസ്സിയെ അവസാന നിമിഷത്തിലും അവർ കൂവി വിളിക്കുകയായിരുന്നു. അവസരം നഷ്ടപ്പെടുത്തിയപ്പോഴാണ് ആരാധകർ മെസ്സിയെ കൂവിയത്.ഈ കാര്യം മാധ്യമങ്ങൾ എല്ലാവരും റിപ്പോർട്ട് ചെയ്തിട്ടുണ്ട്. ഏറ്റവും മോശം ആരാധകർ എന്നാണ് പലരും പിഎസ്ജി ആരാധകരെ വിശേഷിപ്പിച്ചിട്ടുള്ളത്.