അടുത്ത സീസണിൽ MNM മാറും : ഉറപ്പിച്ച് പറഞ്ഞ് നെയ്മർ!

സൂപ്പർ താരം കിലിയൻ എംബപ്പേ പിഎസ്ജിയുമായി തന്റെ കരാർ പുതുക്കിയതോടുകൂടി അടുത്ത സീസണിലും മെസ്സി,നെയ്മർ,എംബപ്പേ ത്രയം പിഎസ്ജിയിൽ ഉണ്ടാകുമെന്ന് ഉറപ്പായിരുന്നു.ലയണൽ മെസ്സി പിഎസ്ജിയിൽ എത്തിയതോട് കൂടിയായിരുന്നു MNM ത്രയം പിഎസ്ജിയിൽ രൂപംകൊണ്ടത്. എന്നാൽ ആരാധകരുടെ പ്രതീക്ഷക്കൊത്തുയരാൻ ഈ കൂട്ടുകെട്ടിന് കഴിഞ്ഞിരുന്നില്ല.

എന്നാൽ അടുത്ത സീസണിൽ വ്യത്യസ്തമായ ഒരു MNM നെ കാണാൻ കഴിയുമെന്നുള്ള ഉറപ്പ് പിഎസ്ജിയുടെ സൂപ്പർ താരമായ നെയ്മർ ജൂനിയർ നൽകിയിട്ടുണ്ട്.MNM ഫോമിലേക്ക് ഉയരുമെന്നാണ് നെയ്മർ വ്യക്തമാക്കുന്നത്. അദ്ദേഹത്തിന്റെ വാക്കുകളെ TYC സ്പോർട്സ് റിപ്പോർട്ട് ചെയ്യുന്നത് ഇങ്ങനെയാണ്.

“കഴിഞ്ഞ ആഴ്ച ടീമിൽ നിന്നും മികച്ച ഒരു വാർത്ത നമുക്ക് കേൾക്കാൻ സാധിച്ചു.കിലിയൻ എംബപ്പേ തുടരുന്നതോടെ ഈ ത്രയം ക്ലബ്ബിൽ നിലനിൽക്കും. എനിക്കുറപ്പുണ്ട് അടുത്ത സീസണിൽ കാര്യങ്ങൾ തീർത്തും വ്യത്യസ്തമായിരിക്കുമെന്ന് ” ഇതാണ് നെയ്മർ പറഞ്ഞിട്ടുള്ളത്.

അതേസമയം എംബപ്പേയും ഇതേ കുറിച്ച് സംസാരിച്ചിരുന്നു.അദ്ദേഹം പറഞ്ഞത് ഇങ്ങനെയാണ്.

” പിഎസ്ജിക്ക് വേണ്ടി കളിക്കുക എന്നുള്ളത് എന്നെ സംബന്ധിച്ചിടത്തോളം ഒരു ബഹുമതിയാണ്. ഈ സീസണിൽ ബുദ്ധിമുട്ടേറിയ ഒരു തുടക്കമായിരുന്നു ഞങ്ങൾക്ക് ഉണ്ടായിരുന്നത്.എന്നാൽ നെയ്മർക്കും മെസ്സിക്കുമൊപ്പം പിന്നീട് നല്ല രൂപത്തിൽ മുന്നോട്ടുപോവാൻ സാധിച്ചിട്ടുണ്ട്. ഞങ്ങളുടെ ലക്ഷ്യങ്ങളെ നേടിയെടുക്കാൻ സാധിക്കും എന്നുള്ളത് ഞങ്ങൾക്ക് തെളിയിക്കേണ്ടതുണ്ട് ” ഇതാണ് എംബപ്പേ പറഞ്ഞത്.

തുടക്കത്തിൽ മികച്ച രൂപത്തിൽ കളിക്കാൻ ഈ ത്രയത്തിന് സാധിച്ചിരുന്നില്ല. എന്നാൽ അവസാന മത്സരങ്ങളിൽ ഈ മൂന്നു താരങ്ങളും മികച്ച പ്രകടനം നടത്തിയിരുന്നു.