സെവൻസ് ടീമിനെ തിരഞ്ഞെടുത്ത് നെയ്മർ, ഇടം നേടിയത് ആരൊക്കെ?

എഫ്സി ബാഴ്സലോണയുടെ ഇതിഹാസമായ ജെറാർഡ് പീക്കെയുടെ നേതൃത്വത്തിൽ നടത്തപ്പെടുന്ന ലീഗാണ് കിങ്സ് ലീഗ്. ബ്രസീലിയൻ സൂപ്പർ താരമായ നെയ്മർ ജൂനിയർ ഇതിന്റെ ഒരു ഭാഗമാണ്. നെയ്മർ കഴിഞ്ഞ ദിവസം കിങ്സ് ലീഗിലെ തന്റെ ഒരു ഡ്രീം ടീമിനെ തിരഞ്ഞെടുത്തിട്ടുണ്ട്. ഒരു സെവൻസ് ടീമിനെയാണ് നെയ്മർ ജൂനിയർ തിരഞ്ഞെടുത്തിട്ടുള്ളത്.

അതിൽ ആരൊക്കെയാണ് ഇടം നേടിയിട്ടുള്ളത് എന്ന് നോക്കാം. ഗോൾകീപ്പറായി കൊണ്ട് ബ്രസീലിയൻ താരമായിരുന്ന ജൂലിയസ് സീസറിനെയാണ് നെയ്മർ തിരഞ്ഞെടുത്തിട്ടുള്ളത്. പ്രതിരോധനിരയിൽ തന്റെ ബ്രസീലിയൻ സഹതാരമായിരുന്ന തിയാഗോ സിൽവക്ക് ഇടം ലഭിച്ചിട്ടുണ്ട്. കൂടാതെ ജെറാർഡ് പീക്കെയെ അദ്ദേഹം തിരഞ്ഞെടുത്തിട്ടുണ്ട്. മധ്യനിരയിൽ ഇനിയേസ്റ്റ വരുന്നുണ്ട്.അതോടൊപ്പം തന്നെ ബ്രസീലിയൻ ഇതിഹാസമായ റൊണാൾഡീഞ്ഞോയെയാണ് നെയ്മർ തിരഞ്ഞെടുത്തിട്ടുള്ളത്.

മുന്നേറ്റ നിരയിൽ റൊണാൾഡോയെയാണ് നെയ്മർ തിരഞ്ഞെടുത്തിട്ടുള്ളത്.ക്രിസ്റ്റ്യാനോ റൊണാൾഡോയാണോ എന്ന് ചോദിക്കപ്പെട്ടപ്പോൾ, അല്ല ബ്രസീലിയൻ റൊണാൾഡോയാണ് എന്ന് നെയ്മർ ജൂനിയർ തന്നെ തിരുത്തിയിട്ടുണ്ട്. കൂടാതെ തന്റെ സുഹൃത്തായ ലയണൽ മെസ്സിയെയും നെയ്മർ മുന്നേറ്റ നിരയിൽ ഉൾപ്പെടുത്തിയിട്ടുണ്ട്. ആരായിരിക്കും ഈ ടീമിന്റെ പരിശീലകൻ എന്ന് ചോദിച്ചപ്പോൾ തമാശക്ക് നെയ്മർ തന്നെയാണ് എന്നാണ് ആദ്യം നെയ്മർ നൽകിയ മറുപടി. പിന്നീട് പരിശീലകനായി കൊണ്ട് ടിറ്റെയെ നെയ്മർ തിരഞ്ഞെടുക്കുകയും ചെയ്തു.

ഇതാണ് നെയ്മറുടെ ഒരു സെവൻസ് ടീം വരുന്നത്. ബ്രസീലിലും ബാഴ്സയിലും തനിക്കൊപ്പം കളിച്ച താരങ്ങളെയാണ് നെയ്മർ പ്രധാനമായും തിരഞ്ഞെടുത്തിട്ടുള്ളത്.നിലവിൽ പരിക്കിന്റെ പിടിയിലാണ് നെയ്മർ ജൂനിയർ ഉള്ളത്. സമീപകാലത്തൊന്നും കളിക്കാൻ അദ്ദേഹത്തിന് കഴിയില്ല എന്നത് സ്ഥിരീകരിക്കപ്പെട്ട കാര്യമാണ്.