സെവിയ്യയുടെയും താരത്തിന്റെയും പരിഹാസട്വീറ്റ്, മറുപടിയുമായി ബാഴ്സയും പുയോളും!

ഇന്നലെ നടന്ന മത്സരത്തിൽ എഫ്സി ബാഴ്സലോണ സെവിയ്യയെ എതിരില്ലാത്ത മൂന്ന് ഗോളുകൾക്ക് പരാജയപ്പെടുത്തി കൊണ്ട് ബാഴ്സ ഫൈനലിൽ പ്രവേശിച്ചിരുന്നു. ആദ്യപാദത്തിൽ എതിരില്ലാത്ത രണ്ട് ഗോളുകൾക്ക് സെവിയ്യ ബാഴ്സയെ പരാജയപ്പെടുത്തിയിരുന്നുവെങ്കിലും ഇന്നലത്തെ മത്സരത്തിൽ ബാഴ്സക്ക് മുന്നിൽ സെവിയ്യ തകർന്നടിയുകയായിരുന്നു. ദിവസങ്ങൾക്ക് മുമ്പ് സെവിയ്യയും സെവിയ്യ താരമായ സൂസോ ഫെർണാണ്ടസും ബാഴ്സയെയും ബാഴ്സ താരം പെഡ്രിയെയും പരിഹസിച്ചു കൊണ്ട് ട്വീറ്റുകൾ ചെയ്തിരുന്നു. ബാഴ്‌സ-പിഎസ്ജി മത്സരത്തിൽ എംബാപ്പെയെ ബാഴ്സ താരം പിക്വേ ജേഴ്സി പിടിച്ചു വലിക്കുന്ന ചിത്രം ഉപയോഗിച്ചായിരുന്നു സെവിയ്യ പരിഹസിച്ചിരുന്നത്. സെവിയ്യയുടെ ചാമ്പ്യൻസ് ലീഗ് പ്രകടനത്തെ വിശേഷിപ്പിക്കാനായിരുന്നു ഈ ചിത്രം സെവിയ്യ ഉപയോഗിച്ചിരുന്നത്.

എന്നാൽ ഇന്നലത്തെ മത്സരത്തിൽ വിജയിച്ചതോടെ ഇതിന് മറുപടിയുമായി രംഗത്ത് വന്നിരിക്കുകയാണ് ബാഴ്സ. ഈ ട്വീറ്റ് റീട്വീറ്റ് ചെയ്ത ശേഷം ബാഴ്‌സ കുറിച്ചത് ഇങ്ങനെയാണ്..” ഫുട്ബോളിൽ ബഹുമാനവുമുണ്ട് ” എന്നായിരുന്നു ബാഴ്സയുടെ മറുപടി. അതേസമയം സെവിയ്യ 2-0 എന്ന സ്കോറിന് വിജയിച്ച മത്സരത്തിന് ശേഷം യുവതാരം പെഡ്രി കുറച്ചു കാര്യങ്ങൾ മാധ്യമങ്ങളോട് പറഞ്ഞിരുന്നു. പെനാൽറ്റി തങ്ങൾ അർഹിച്ചിരുന്നു എന്നാണ് പെഡ്രിയുടെ വാദം. ഈ വാർത്ത റീട്വീറ്റ് ചെയ്തു കൊണ്ട് സെവിയ്യ താരം സൂസോ പെഡ്രിയെ പരിഹസിച്ചിരുന്നു. ക്രൈ ബേബി എന്ന രൂപേണ കരയുന്ന ഇമോജി വെച്ച് കൊണ്ടാണ് സൂസോ പെഡ്രിയെ പരിഹസിച്ചിരുന്നത്. എന്നാൽ മത്സരത്തിന് ശേഷം ബാഴ്‌സ ഇതിഹാസതാരം പുയോൾ ഇതിന് മറുപടിയുമായി എത്തി.Good Night എന്നായിരുന്നു ഇത് റീട്വീറ്റ് ചെയ്തു കൊണ്ട് പുയോളിന്റെ മറുപടി. ഏതായാലും സെവിയ്യയെ സംബന്ധിച്ചെടുത്തോളം തുടർച്ചയായ രണ്ട് മത്സരങ്ങളിൽ ബാഴ്സയോട് പരാജയപെടേണ്ടി വന്നതും ആകെ അഞ്ച് ഗോളുകൾ വഴങ്ങേണ്ടി വന്നതും നാണക്കേടായിരിക്കുകയാണ്.