സിദാൻ പരിഗണിക്കുന്നില്ല, റയൽ മാഡ്രിഡ്‌ വിടാൻ അനുമതി തേടി യുവതാരം !

ഈ സീസണിലായിരുന്നു മധ്യനിരയിലെ മിന്നും ഒഡീഗാർഡ് റയൽ സോസിഡാഡിലെ ലോൺ കഴിഞ്ഞ് റയൽ മാഡ്രിഡിലേക്ക് തിരിച്ചെത്തിയത്. സോസിഡാഡിന് വേണ്ടി മിന്നും പ്രകടനമായിരുന്നു താരത്തിന്റെ ഭാഗത്തു നിന്നുണ്ടായത്.തുടർന്ന് റയലിലേക്ക് തിരിച്ചെത്തിയ താരത്തെ വലിയ പ്രതീക്ഷകളോടെയായിരുന്നു ആരാധകർ നോക്കി കണ്ടിരുന്നത്. എന്നാൽ ആറു മാസങ്ങൾക്കിപ്പുറം കാര്യങ്ങൾ ആകെ മാറിമറിഞ്ഞിരിക്കുന്നു. റയൽ മാഡ്രിഡിൽ അവസരങ്ങൾ ലഭിക്കാത്ത ഒഡീഗാർഡ് ക്ലബ് വിടാൻ റയൽ മാഡ്രിഡിനോട് അനുമതി തേടിയിട്ടുണ്ട്. മാർക്കയുൾപ്പെടുന്ന സ്പാനിഷ് മാധ്യമങ്ങൾ എല്ലാം തന്നെ ഇക്കാര്യം റിപ്പോർട്ട്‌ ചെയ്തിട്ടുണ്ട്. ഈ ജനുവരിയിൽ തന്നെ ക്ലബ് വിടാൻ ആഗ്രഹിക്കുന്നുണ്ട് എന്നാണ് ഒഡീഗാർഡ് റയലിനെ അറിയിച്ചത്. പരിശീലകൻ സിദാൻ പരിഗണിക്കാത്തതിൽ താരം കടുത്ത അസംതൃപ്തിയിലാണ്.

ലോണിൽ മറ്റേതെങ്കിലും ക്ലബ്ബിൽ പോയി കളിക്കാനാണ് ഒഡീഗാർഡ് ആഗ്രഹിക്കുന്നത്. ഇതിന് റയൽ മാഡ്രിഡ്‌ സമ്മതം മൂളിയെക്കുമെന്നും വാർത്തകൾ ഉണ്ട്. അങ്ങനെയാണെങ്കിൽ ഈ ജനുവരി ട്രാൻസ്ഫറിൽ തന്നെ ഒഡീഗാർഡ് മറ്റേതെങ്കിലും ക്ലബ്ബിലേക്ക് ചേക്കേറിയേക്കും. കേവലം 367 മിനിറ്റുകൾ മാത്രമാണ് ഈ സീസണിൽ ഒഡീഗാർഡ് കളിച്ചിട്ടുള്ളത്. സ്ഥിരമായി ഇടം ലഭിക്കുന്ന ഒരിടത്തേക്ക് പോവാനാണ് ഒഡീഗാർഡ് ആഗ്രഹിക്കുന്നത്. യുവതാരങ്ങളെ പരിഗണിക്കാത്തതിൽ ഈയിടെയായി സിദാൻ വലിയ വിമർശനങ്ങൾ ഏറ്റു വാങ്ങുന്നുണ്ട്. സിദാൻ ആണ് പരിശീലകനെങ്കിൽ റയൽ മാഡ്രിഡിലേക്ക് തിരികെ വരില്ലെന്ന് ലോണിൽ എസി മിലാനിൽ കളിക്കുന്ന ബ്രാഹിം ഡയസ് വ്യക്തമാക്കിയിരുന്നു.