വീണ്ടും പെനാൽറ്റിയും റാമോസും, റയൽ ജയിച്ചു കയറി

ലാ ലിഗയിലെ മുപ്പത്തിനാലാം റൗണ്ട് മത്സരത്തിൽ റയൽ മാഡ്രിഡിന് ജയം. ഏക പക്ഷീയമായ ഒരു ഗോളിന് അത്ലറ്റിക്ക് ക്ലബ്ബ് ബിൽബാവോയെയാണവർ തോൽപ്പിച്ചത്. റയൽ മാഡ്രിഡിൻ്റെ വിജയഗോൾ നായകൻ സെർജിയോ റാമോസ് പെനാൽറ്റിയിലൂടെയാണ് നേടിയത്. ഈ വിജയത്തോടെ 34 മത്സരങ്ങളിൽ നിന്നും 77 പോയിൻ്റുമായി അവർ ലാ ലിഗ ടേബിളിൽ ഒന്നാം സ്ഥാനത്ത് തുടരുകയാണ്.

അത്ലറ്റിക്ക് ക്ലബ്ബിൻ്റെ മൈതാനത്ത് നടന്ന മത്സരത്തിൻ്റെ ആദ്യ പകുതി ഗോൾ രഹിതമായിരുന്നു. ആദ്യ പകുതിയുടെ അവസാനത്തിൽ അസെൻസിയോയുടെ ക്രോസിൽ നിന്നും ബെൻസീമ ഉതിർത്ത ഹെഡ്ഡർ ഇഞ്ചുകളുടെ വ്യത്യാസത്തിൽ പുറത്ത് പോയതോടെ ഗോൾ രഹിതമായി ഇരു ടീമുകളും ഇടവേളക്ക് പിരിഞ്ഞു.

രണ്ടാം പകുതിയിൽ എഴുപത്തിമൂന്നാം മിനുട്ടിലാണ് റയലിൻ്റെ വിജയഗോൾ പിറന്നത്. ബോക്സിനകത്ത് വെച്ച് മാഴ്സലോയെ ഫൗൾ ചെയ്ത് വീഴ്ത്തിയതിന് റഫറി ബിൽബാവോ ക്കെതിരെ പെനാൽറ്റി വിധിച്ചു. കിക്കെടുത്ത റാമോസ് പന്ത് വലയിലാക്കി. ലീഡെടുത്തതോടെ റോഡ്രിഗോ, അസെൻസിയോ എന്നിവരെ പിൻവലിച്ച് സിദാൻ ലൂക്കാസ് വാസ്ക്കെസിനെയും വിനീഷ്യസ് ജൂനിയറെയും കളത്തിലേക്ക് വിട്ട് ആക്രമണത്തിന് മൂർച്ച കൂട്ടാൻ ശ്രമിച്ചെങ്കിലും മത്സരത്തിൽ പിന്നീട് ഗോളുകൾ പിറന്നില്ല.