വീണ്ടും നാണംകെട്ട് PSG,ഒരിക്കൽ കൂടി റയലിനെ തറപറ്റിച്ച് ബാഴ്സ!

ഇന്നലെ ലീഗ് വണ്ണിൽ നടന്ന മത്സരത്തിൽ പിഎസ്ജിക്ക് പരാജയം. എതിരില്ലാത്ത രണ്ട് ഗോളുകൾക്കാണ് പിഎസ്ജിയെ റെന്നസ് പരാജയപ്പെടുത്തിയത്. ആദ്യപകുതിയുടെ അവസാനത്തിലും രണ്ടാം പകുതിയുടെ തുടക്കത്തിലുമായി റെന്നസ് ഗോളുകൾ നേടുകയായിരുന്നു.

സ്വന്തം മൈതാനത്ത് വെച്ചാണ് ഈ ഒരു തോൽവി പിഎസ്ജി ഏറ്റുവാങ്ങിയിട്ടുള്ളത്.സൂപ്പർ താരങ്ങളായ ലയണൽ മെസ്സി,കിലിയൻ എംബപ്പേ എന്നിവർ ഉണ്ടായിരുന്നുവെങ്കിലും കാര്യമായി ഒന്നും ചെയ്യാൻ സാധിക്കാതെ പോവുകയായിരുന്നു. പരിക്കു മൂലം പ്രതിരോധം നിലയിലെ പല പ്രധാനപ്പെട്ട താരങ്ങളും ഇല്ലാത്തത് പിഎസ്ജിക്ക് തിരിച്ചടിയാവുകയും ചെയ്തു.

അതേസമയം ഇന്നലെ സ്പാനിഷ് ലീഗിൽ നടന്ന എൽ ക്ലാസിക്കോ മത്സരത്തിൽ ബാഴ്സ വിജയം കരസ്ഥമാക്കിയിട്ടുണ്ട്. ഒന്നിനെതിരെ രണ്ട് ഗോളുകൾക്കാണ് ബാഴ്സ റയലിനെ പരാജയപ്പെടുത്തിയത്.അരൗഹോയുടെ സെൽഫ് ഗോളിൽ ബാഴ്സ പിറകിൽ പോയെങ്കിലും റോബെർട്ടോ,കെസ്സി എന്നിവരുടെ ഗോളുകളിലൂടെ ബാഴ്സ വിജയം നേടുകയായിരുന്നു. ഇതോടെ അവസാനമായി കളിച്ച മൂന്ന് ക്ലാസിക്കോകളിലും വിജയം നേടാൻ ബാഴ്സക്ക് കഴിഞ്ഞു.

ഇന്നലെ FA കപ്പിൽ നടന്ന മത്സരത്തിൽ വിജയം നേടാൻ മാഞ്ചസ്റ്റർ യുണൈറ്റഡിന് കഴിഞ്ഞിട്ടുണ്ട്. ഒന്നിനെതിരെ മൂന്നു ഗോളുകൾക്കാണ് ഫുൾഹാമിനെ യുണൈറ്റഡ് പരാജയപ്പെടുത്തിയത്.ബ്രൂണോ ഫെർണാണ്ടസ് ഇരട്ട ഗോളുകൾ നേടിയപ്പോൾ സാബിറ്റ്സറാണ് ശേഷിച്ച ഗോൾ കരസ്ഥമാക്കിയത്.