വിനീഷ്യസിനാണ് ബാലൺഡി’ഓർ നൽകേണ്ടത്:മിലിറ്റാവോ

ഇന്നലെ ലാലിഗയിൽ നടന്ന മത്സരത്തിൽ തകർപ്പൻ വിജയമാണ് റയൽ മാഡ്രിഡ് സ്വന്തമാക്കിയിട്ടുള്ളത്. എതിരില്ലാത്ത 5 ഗോളുകൾക്കാണ് അവർ അലാവസിനെ പരാജയപ്പെടുത്തിയത്. സൂപ്പർ താരങ്ങളായ വിനീഷ്യസ് ജൂനിയർ,ജൂഡ് ബെല്ലിങ്ങ്ഹാം എന്നിവരാണ് മത്സരത്തിൽ തിളങ്ങിയത്.വിനീഷ്യസ് ഇരട്ട ഗോളുകൾ നേടിയപ്പോൾ ബെല്ലിങ്ങ്ഹാം ഒരു ഗോളും രണ്ട് അസിസ്റ്റുകളും ഈ മത്സരത്തിൽ കരസ്ഥമാക്കി.

രണ്ടുപേരും മികച്ച പ്രകടനമാണ് ഈ സീസണിൽ പുറത്തെടുക്കുന്നത്.ബാലൺഡി’ഓർ പോരാട്ടത്തിൽ മുൻപന്തിയിൽ നിൽക്കുന്നത് ഈ രണ്ടു താരങ്ങളുമാണ്. എന്നാൽ ഇവരിൽ ആർക്കാണ് ബാലൺഡി’ഓർ നൽകേണ്ടതെന്ന് റയൽ മാഡ്രിഡിന്റെ ബ്രസീലിയൻ സൂപ്പർതാരമായ എഡർ മിലിട്ടാവോയോട് ചോദിക്കപ്പെട്ടിരുന്നു.വിനീഷ്യസ് ജൂനിയറെയാണ് അദ്ദേഹം തിരഞ്ഞെടുത്തത്.മിലിറ്റാവോ പറഞ്ഞ വാക്കുകൾ ഇങ്ങനെയാണ്.

“വിനീഷ്യസും ബെല്ലിങ്ങ്ഹാമും മികച്ച പ്രകടനമാണ് ഇപ്പോൾ നടത്തുന്നത്.പക്ഷേ ബാലൺഡി’ഓറിന്റെ കാര്യത്തിൽ ഞാൻ വിനീഷ്യസിനെ തിരഞ്ഞെടുക്കുന്നു. നിലവിൽ അദ്ദേഹമാണ് മികച്ച താരം. ഇതുപോലെ ഇനിയും മുന്നോട്ട് പോവുകയാണെങ്കിൽ തീർച്ചയായും അദ്ദേഹത്തെ അധികം വൈകാതെ ബാലൺഡി’ഓർ നേടാൻ സാധിക്കും ” ഇതാണ് റയൽ താരം പറഞ്ഞിട്ടുള്ളത്.

23 ഗോളുകളും 11 അസിസ്റ്റുകളുമാണ് വിനീഷ്യസ് ഈ സീസണിൽ സ്വന്തമാക്കിയിട്ടുള്ളത്. അതേസമയം ബെല്ലിങ്ങ്ഹാം 23 ഗോളുകളും 12 അസിസ്റ്റുകളുമാണ് സ്വന്തമാക്കിയിട്ടുള്ളത്.യുവേഫ ചാമ്പ്യൻസ് ലീഗ് കിരീടം നേടിയാൽ ഈ രണ്ടുപേർക്കും ഒരുപോലെ സാധ്യതകൾ ഉണ്ടാകും.പിന്നീട് നടക്കുന്ന യൂറോകപ്പ്, കോപ്പ അമേരിക്ക എന്നിവയെ ആശ്രയിച്ചായിരിക്കും ഈ ബാലൺഡി’ഓർ പുരസ്കാര സാധ്യതകൾ നിലനിൽക്കുക.