ലെവന്റോസ്ക്കിക്ക് ഗോളടിക്കാനാവുന്നില്ല,പ്രതികരണവുമായി സാവി!

ഈ ട്രാൻസ്ഫർ ജാലകത്തിൽ എഫ്സി ബാഴ്സലോണയിലേക്ക് എത്തിയ സൂപ്പർതാരം റോബർട്ട് ലെവന്റോസ്ക്കി ബാഴ്സക്ക് വേണ്ടി അരങ്ങേറ്റം കുറിച്ചിരുന്നു.മാത്രമല്ല ആകെ മൂന്നു മത്സരങ്ങളിലും താരം ബാഴ്സക്ക് വേണ്ടി കളിച്ചിട്ടുണ്ട്. എന്നാൽ ഇതുവരെ ബാഴ്സക്ക് വേണ്ടി ഗോൾ നേടാൻ താരത്തിന് സാധിച്ചിരുന്നില്ല.സാധാരണ രൂപത്തിൽ ഗോളടിച്ച് കൂട്ടുന്ന താരത്തിന് ഗോൾ നേടാൻ സാധിക്കാതെ ചിലർക്കിടയിലെങ്കിലും ആശങ്ക ഉണ്ടാക്കിയിരുന്നു.

കഴിഞ്ഞ ദിവസത്തെ പത്രസമ്മേളനത്തിൽ ബാഴ്സയുടെ പരിശീലകനായ സാവിയോട് ഇതേ കുറിച്ച് ചോദിക്കപ്പെടുകയും ചെയ്തിരുന്നു. എന്നാൽ ഈ വിഷയത്തിൽ സാവിക്ക് ആശങ്കയൊന്നുമില്ല. മുമ്പ് സുവാരസിന്റെ തുടക്കകാലത്തും ഇങ്ങനെയായിരുന്നു എന്നാണ് സാവി ഇതിനെ മറുപടിയായി കൊണ്ട് പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ മാർക്ക റിപ്പോർട്ട് ചെയ്യുന്നത് ഇങ്ങനെയാണ്.

” പരിശീലനത്തിൽ ലെവന്റോസ്ക്കി ഗോളുകൾ നേടുന്നുണ്ട്.പക്ഷേ മത്സരത്തിൽ അദ്ദേഹത്തിന് അത് സാധിച്ചില്ല.പക്ഷേ ഇത് സധാരണമായ ഒരു കാര്യമാണ്. ലൂയിസ് സുവാരസ് ടീമിൽ എത്തിയ സമയത്തും ഫെറാൻ ടോറസ് എത്തിയ സമയത്തുമൊക്കെ അവർ ഇത് അനുഭവിച്ചതാണ്. തീർച്ചയായും ലെവന്റോസ്ക്കി ഗോളുകൾ നേടുക തന്നെ ചെയ്യും.കൂടുതൽ ഗോളുകൾ നേടാൻ അദ്ദേഹത്തിന് സാധിക്കുമെന്ന് തന്നെയാണ് ഞാൻ കരുതുന്നത് ” ഇതാണ് സാവി പറഞ്ഞിട്ടുള്ളത്.

മറ്റൊരു സൂപ്പർ താരമായ റാഫിഞ്ഞയെ സാവി പ്രശംസിച്ചിട്ടുണ്ട്.റാഫീഞ്ഞ തങ്ങളെ വളരെയധികം സഹായിക്കുന്നുവെന്നും ഈ സീസണിലെ മികച്ച സൈനിങ്ങാണ് അദ്ദേഹമെന്നുമാണ് സാവി പറഞ്ഞിട്ടുള്ളത്.