റൊണാൾഡോ റയലിലേക്കെത്തുമെന്ന അഭ്യൂഹങ്ങൾ, സത്യമാകാമെന്ന് സിദാൻ!

ദിവസങ്ങൾക്ക് മുമ്പായിരുന്നു ക്രിസ്റ്റ്യാനോ റൊണാൾഡോയെ ചുറ്റിപ്പറ്റി നിരവധി അഭ്യൂഹങ്ങൾ പരന്നിരുന്നത്. ചാമ്പ്യൻസ് ലീഗിൽ പോർട്ടോയോട് പരാജയപ്പെട്ട് പുറത്തായതിന് പിന്നാലെയാണ് താരത്തെ യുവന്റസ് വിൽക്കുമെന്നുള്ള വാർത്തകൾ പുറത്തേക്ക് വന്നത്. അതിന് പിന്നാലെയാണ് റയൽ മാഡ്രിഡ്‌ താരത്തെ തിരികെ ടീമിൽ എത്തിക്കുമെന്ന വാർത്തകൾ പുറത്തേക്ക് വന്നത്. ഈ അഭ്യൂഹങ്ങളോട് ഒരിക്കൽ കൂടി പ്രതികരിച്ചിരിക്കുകയാണ് റയൽ മാഡ്രിഡ്‌ പരിശീലകൻ സിദാൻ.ഇന്ന് അറ്റലാന്റക്കെതിരെ നടക്കുന്ന മത്സരത്തിന് മുന്നോടിയായുള്ള പത്രസമ്മേളനത്തിൽ സംസാരിക്കുകയായിരുന്നു സിദാൻ. ഈ അഭ്യൂഹങ്ങൾ സത്യമാകാം എന്നാണ് സിദാൻ പറഞ്ഞത്.

” അഭ്യൂഹങ്ങൾ ഒരുപക്ഷെ സത്യമായേക്കാം.നമുക്ക് എല്ലാവർക്കും ക്രിസ്റ്റ്യാനോയെ അറിയുന്നതാണ്.അദ്ദേഹം എന്തൊക്കെ റയലിന് വേണ്ടി ചെയ്തു എന്നുള്ളതും നമുക്കറിയാം.പക്ഷെ അദ്ദേഹം ഇപ്പോൾ യുവന്റസ് താരമാണ്.അതായത് അദ്ദേഹം ഇപ്പോൾ മറ്റൊരു ടീമിന് വേണ്ടി കളിക്കുന്നു എന്നർത്ഥം.ഭാവിയിൽ എന്ത് സംഭവിക്കുമെന്ന് നമുക്ക് കാത്തിരുന്നു കാണാം ” സിദാൻ പറഞ്ഞു. ക്രിസ്റ്റ്യാനോയെ ഒരുപക്ഷെ റയൽ തിരികെ എത്തിക്കാൻ ശ്രമിച്ചേക്കുമെന്നുള്ള സൂചനകളാണ് സിദാൻ ഇതിലൂടെ നൽകിയത്.റയൽ മാഡ്രിഡിന്റെ ടോപ് സ്‌കോററാണ് ക്രിസ്റ്റ്യാനോ.438 മത്സരങ്ങളിൽ നിന്ന് 450 ഗോളുകൾ താരം നേടിയിട്ടുണ്ട്. ഇപ്പോഴും മികച്ച ഫോമിലാണ് താരം കളിക്കുന്നത്.