റയൽ വിജയിക്കുമെന്ന് പ്രവചനം,മെക്സിക്കൻ ഗായികയുടെ പരിപാടി റദ്ദാക്കി അത്ലറ്റിക്കോ!

ഈ സീസണിലെ ആദ്യ മാഡ്രിഡ് ഡെർബി നാളെയാണ് അരങ്ങേറുന്നത്.നഗരവൈരികളായ റയൽ മാഡ്രിഡും അത്ലറ്റിക്കോ മാഡ്രിഡും തമ്മിലാണ് ഏറ്റുമുട്ടുന്നത്. ഞായറാഴ്ച അർദ്ധരാത്രി ഇന്ത്യൻ സമയം 12:30നാണ് ഈയൊരു മത്സരം നടക്കുന്നത്.അത്ലറ്റിക്കോ മാഡ്രിഡിന്റെ മൈതാനത്ത് വെച്ചുകൊണ്ടാണ് ഈ മത്സരം നടക്കുക.

ഈ മത്സരത്തിന്റെ ആദ്യ പകുതിയുടെ സമയത്ത് ഒരു പ്രോഗ്രാം സംഘടിപ്പിക്കാൻ അത്ലറ്റിക്കോ മാഡ്രിഡ് തീരുമാനിച്ചിരുന്നു. അതായത് മെക്സിക്കൻ ഗായികയും നടിയുമായ ഡന്ന പവോലയുടെ ഒരു പെർഫോമൻസ് ആയിരുന്നു ഷെഡ്യൂൾ ചെയ്തിരുന്നത്. എന്നാൽ പിന്നീട് അത്ലറ്റിക്കോ മാഡ്രിഡ് ഈ പരിപാടി ക്യാൻസൽ ചെയ്യുകയായിരുന്നു.അതിന്റെ കാരണങ്ങൾ സ്പാനിഷ് മാധ്യമങ്ങൾ കണ്ടെത്തിയിട്ടുണ്ട്.

മറ്റൊന്നുമല്ല ഈ ഗായിക ഒരു റയൽ മാഡ്രിഡ് ആരാധികയാണ്. താനൊരു മാഡ്രിഡിസ്റ്റയാണ് എന്നുള്ളത് അവർ തന്നെ പറയുകയായിരുന്നു. മാത്രമല്ല മത്സരത്തിൽ ഒന്നിനെതിരെ 2 ഗോളുകൾക്ക് റയൽ അത്ലറ്റിക്കോയെ പരാജയപ്പെടുത്തുമെന്നും ഇവർ പ്രവചിച്ചു. ഇത് അത്ലറ്റിക്കോ മാഡ്രിഡ് മാനേജ്മെന്റിന് പിടിച്ചില്ല.അതുകൊണ്ടുതന്നെ ഈ പരിപാടി ക്യാൻസൽ ചെയ്യാൻ അവർ തീരുമാനിക്കുകയായിരുന്നു.

ഏതായാലും ഇത് വലിയ വാർത്ത പ്രാധാന്യം നേടിയിട്ടുണ്ട്. കഴിഞ്ഞ സീസണിൽ അത്ലറ്റിക്കോ മാഡ്രിഡിനോട് രണ്ട് തവണ പരാജയപ്പെടേണ്ടി വന്ന ടീമാണ് റയൽ മാഡ്രിഡ്.കോപ ഡെൽ റേയിൽ നിന്നും റയലിനെ പുറത്താക്കിയത് ഇവർ തന്നെയായിരുന്നു.അതിനെ പ്രതികാരം തീർക്കുക എന്ന ഒരു ലക്ഷ്യം കൂടി റയൽ മാഡ്രിഡിന് ഉണ്ടാകും. നിലവിൽ പോയിന്റ് പട്ടികയിൽ റയൽ മാഡ്രിഡ് രണ്ടാം സ്ഥാനത്തും അത്ലെറ്റിക്കോ മാഡ്രിഡ് മൂന്നാം സ്ഥാനത്തുമാണ് ഉള്ളത്.