റയൽ മാഡ്രിഡ്‌ താരത്തെ ആവിശ്യപ്പെട്ടു കൊണ്ട് ലാസിയോ

റയൽ മാഡ്രിഡിന്റെ യുവതാരം ബോർജ മയോറോളിനെ ആവിശ്യപ്പെട്ടു കൊണ്ട് ഇറ്റാലിയൻ കരുത്തരായ ലാസിയോ രംഗത്ത്. പ്രമുഖഇറ്റാലിയൻ മാധ്യമമായ സ്കൈ സ്പോർട്സ് ഇറ്റാലിയയുടെ റിപ്പോർട്ടറായ ഡി മർസിയോ ആണ് ഈ വാർത്ത ഫുട്ബോൾ ലോകത്തിന് പങ്കുവെച്ചതിന്. താരത്തെ ക്ലബിൽ എത്തിക്കാൻ വേണ്ടി ലാസിയോ റയലിനെ സമീപിച്ചതായാണ് വാർത്തകൾ. ഇരുപത്തിമൂന്നുകാരനായ ഈ സ്പാനിഷ് താരം നിലവിൽ ലാലിഗയിൽ ലെവന്റെക്ക് വേണ്ടിയാണ് കളിക്കുന്നത്. ഈ യുവസ്‌ട്രൈക്കറെ എത്തിക്കുന്നതിലൂടെ ടീമിന്റെ കരുത്ത് വർധിപ്പിക്കാനാണ് ലാസിയോ ശ്രമിക്കുന്നത്. പ്രത്യേകിച്ച് അടുത്ത ചാമ്പ്യൻസ് ലീഗിലേക്ക് യോഗ്യത നേടിയാൽ മികച്ച പ്രകടനം കാഴ്ച്ചവെക്കാൻ താരങ്ങളെ ആവിശ്യമാണ് എന്ന കണക്കുക്കൂട്ടലിലാണ് ലാസിയോ. നിലവിൽ സിരി എയിൽ നാലാം സ്ഥാനമാണ് ലാസിയോക്ക്. അഞ്ചാം സ്ഥാനക്കാരായ റോമയുമായി പന്ത്രണ്ട് പോയിന്റിന്റെ ലീഡ് ലാസിയോക്കുണ്ട്.

2007 മുതൽ റയൽ മാഡ്രിഡിലൂടെ വളർന്ന താരമാണ് മയോറോൾ. 2015-ൽ കുറച്ചു മത്സരങ്ങൾ റയലിന് വേണ്ടി കളിച്ച താരം പിന്നീട് ലോണിൽ വോൾഫ്സ്ബർഗിലേക്ക് ചേക്കേറിയിരുന്നു. തുടർന്ന് റയലിൽ തന്നെ തിരിച്ചെത്തിയ താരം പിന്നീട് ലെവന്റെയിലേക്ക് ലോണിൽ പോവുകയായിരുന്നു. ജൂൺ 2021 വരെയാണ് താരത്തിന്റെ കരാർ. ഈ സീസണിൽ ഭേദപ്പെട്ട പ്രകടനം പുറത്തെടുക്കാൻ താരത്തിന് സാധിച്ചിട്ടുണ്ട്. 33 മത്സരങ്ങളിൽ നിന്ന് എട്ട് ഗോളുകൾ താരം നേടിയിട്ടുണ്ട്. താരത്തിന് വേണ്ടിയുള്ള നീക്കത്തിൽ റയൽ മാഡ്രിഡിന്റെ മറുപടിക്ക് കാത്തിരിക്കുകയാണ് ലാസിയോ.