റയലിന് വിജയം, യുവന്റസിന് അട്ടിമറി തോൽവി!

ഇന്നലെ ലാലിഗയിൽ നടന്ന മത്സരത്തിൽ വമ്പൻമാരായ റയൽ മാഡ്രിഡിന് വിജയം. ഏകപക്ഷീയമായ ഒരു ഗോളിനാണ് റയൽ മാഡ്രിഡ്‌ റയൽ ബെറ്റിസിനെ കീഴടക്കിയത്. ഡാനി കാർവഹലാണ് റയലിന്റെ വിജയഗോൾ നേടിയത്.മത്സരത്തിന്റെ 61-ആം മിനുട്ടിൽ കരിം ബെൻസിമയുടെ ക്രോസിൽ നിന്നാണ് കാർവഹാൽ ഗോൾ നേടിയത്.റയലിന് വേണ്ടി വിനീഷ്യസ് ജൂനിയർ, തിബൗട്ട് കോർട്ടുവ എന്നിവരും മികച്ച പ്രകടനം കാഴ്ച്ചവെച്ചു.ജയത്തോടെ റയൽ പോയിന്റ് ടേബിളിൽ ഒന്നാം സ്ഥാനത്തെത്തിയിട്ടുണ്ട്.

അതേസമയം സിരി എ നടന്ന മത്സരത്തിൽ വമ്പൻമാരായ യുവന്റസിന് അട്ടിമറി തോൽവി. എംപോളിയാണ് യുവന്റസിനെ ഒരു ഗോളിന് പരാജയപ്പെടുത്തിയത്. സൂപ്പർ താരം ക്രിസ്റ്റ്യാനോ ക്ലബ് വിട്ടതിന് ശേഷമുള്ള ആദ്യ മത്സരത്തിൽ തന്നെ യുവന്റസിന് അടിതെറ്റുകയായിരുന്നു.21-ആം മിനുട്ടിൽ മാങ്കുസോ നേടിയ ഗോളാണ് എംപോളിക്ക്‌ ജയം നേടികൊടുത്തത്.ഡിബാല ഉൾപ്പെടുന്ന സൂപ്പർ താരങ്ങൾ അണിനിരന്നുവെങ്കിലും യുവന്റസിന് ഗോൾ മാത്രം കണ്ടെത്താൻ കഴിയാതെ പോവുകയായിരുന്നു.ഇതോടെ യുവന്റസ് പോയിന്റ് ടേബിളിൽ 13-ആം സ്ഥാനത്തേക്ക് കൂപ്പുകുത്തി. രണ്ട് മത്സരങ്ങൾ പൂർത്തിയായപ്പോൾ ഒരു ജയം പോലും നേടാൻ യുവന്റസിന് സാധിച്ചില്ല.