യമാൽ അത്ഭുതപ്പെടുത്തുന്നു, പക്ഷേ റാഫിഞ്ഞയെ മറക്കരുത്: എതിർപരിശീലകൻ!

ഇന്ന് ലാലിഗയിൽ നടക്കുന്ന മത്സരത്തിൽ ബാഴ്സലോണ കളിക്കളത്തിലേക്ക് ഇറങ്ങുന്നുണ്ട്. ഒമ്പതാം റൗണ്ട് പോരാട്ടത്തിൽ ഡിപോർട്ടിവോ അലാവസാണ് ബാഴ്സയുടെ എതിരാളികൾ. ഇന്ന് രാത്രി ഇന്ത്യൻ സമയം 7:45നാണ് ഈയൊരു മത്സരം നടക്കുക.അലാവസിന്റെ മൈതാനത്ത് വെച്ചുകൊണ്ടാണ് ഈ മത്സരം അരങ്ങേറുക. കഴിഞ്ഞ ലീഗ് മത്സരത്തിൽ ബാഴ്സലോണ ഒസാസുനയോട് പരാജയപ്പെട്ടിരുന്നു. അതിൽ നിന്നും കരകയറണമെങ്കിൽ ഇന്നത്തെ മത്സരത്തിൽ വിജയം അനിവാര്യമാണ്.

ബാഴ്സക്ക് വേണ്ടി തകർപ്പൻ പ്രകടനമാണ് അവരുടെ മുന്നേറ്റ നിര പുറത്തെടുക്കുന്നത്.ലാമിൻ യമാലും റാഫീഞ്ഞയുമൊക്കെ അത്ഭുതകരമായ പ്രകടനം നടത്തുന്നു. അത് മുതലെടുത്ത് കൊണ്ട് ലെവന്റോസ്ക്കി ഗോളടിച്ചു കൂട്ടുന്നു. ഇവരെ പ്രശംസിച്ചുകൊണ്ട് അലാവസിന്റെ പരിശീലകനായ ലൂയിസ് ഗാർഷ്യ പ്ലാസ രംഗത്ത് വന്നിട്ടുണ്ട്.യമാൽ,റാഫീഞ്ഞ എന്നിവരെക്കുറിച്ച് അദ്ദേഹം പറഞ്ഞ വാക്കുകൾ ഇങ്ങനെയാണ്.

“ഫ്ലിക്കിന്റെ കീഴിലുള്ള ബാഴ്സയുടെ പ്രകടനം അത്ഭുതപ്പെടുത്തുന്നതാണ്.ഇപ്പോൾതന്നെ ലോകത്തിലെ ഏറ്റവും മികച്ച താരങ്ങളിൽ ഒരാളായി മാറാൻ യമാലിന് സാധിച്ചിട്ടുണ്ട്.വളരെയധികം പ്രതിഭാധനനായ ഒരു താരമാണ് അദ്ദേഹം.യമാൽ ഒരു ചരിത്രം രേഖപ്പെടുത്തുമെന്ന് തന്നെയാണ് ഞാൻ വിശ്വസിക്കുന്നത്. എന്നാൽ ഇവിടെ റാഫീഞ്ഞയെ കൂടി എടുത്തു പറയേണ്ടതുണ്ട്. അദ്ദേഹത്തിന്റെ ഇപ്പോഴത്തെ ലെവൽ തീർച്ചയായും ഒരു അത്ഭുത ദൃശ്യമാണ് “ഇതാണ് എതിർ പരിശീലകൻ പറഞ്ഞിട്ടുള്ളത്.

ഓഗസ്റ്റ് മാസത്തിലെ ഏറ്റവും മികച്ച ലാലിഗ താരത്തിനുള്ള പുരസ്കാരം സ്വന്തമാക്കിയത് റാഫീഞ്ഞയാണ്. സെപ്റ്റംബർ മാസത്തിലെ ഏറ്റവും മികച്ച ലാലിഗ താരത്തിനുള്ള പുരസ്കാരം യമാലും സ്വന്തമാക്കി. അഞ്ച് ഗോളുകളും 5 അസിസ്റ്റുകളും ഈ സീസണിൽ ബാഴ്സക്ക് വേണ്ടി നേടാൻ യമാലിന് സാധിച്ചിട്ടുണ്ട്. അതേസമയം 6 ഗോളുകളും മൂന്ന് അസിസ്റ്റുകളുമാണ് റാഫീഞ്ഞ ഈ സീസണിൽ സ്വന്തമാക്കിയിട്ടുള്ളത്.