മാഞ്ചസ്റ്റർ സിറ്റിയുടെ സൂപ്പർതാരവുമായി ബാഴ്സ കരാറിലെത്തിയതായി വാർത്ത!

വരുന്ന സമ്മർ ട്രാൻസ്ഫർ വിൻഡോയിൽ സ്പാനിഷ് വമ്പൻമാരായ എഫ്സി ബാഴ്സലോണ തങ്ങളുടെ ക്ലബ്ബിലേക്ക് എത്തിക്കാൻ ഏറ്റവും കൂടുതൽ താല്പര്യപ്പെടുന്ന താരങ്ങളിൽ ഒരാളാണ് മാഞ്ചസ്റ്റർ സിറ്റിയുടെ മധ്യനിര താരമായ ഇൽകെയ് ഗുണ്ടോഗൻ. അദ്ദേഹത്തിന്റെ ക്ലബ്ബുമായുള്ള കോൺട്രാക്ട് ഈ സീസണോട് കൂടിയാണ് അവസാനിക്കുക. ഈ കരാർ പുതുക്കാൻ മാഞ്ചസ്റ്റർ സിറ്റിക്ക് താല്പര്യമുണ്ട്. മാത്രമല്ല പുതിയ ഒരു ഓഫർ അവർ താരത്തിന് നൽകുകയും ചെയ്തിട്ടുണ്ട്.

പക്ഷേ ഗുണ്ടോഗൻ മാഞ്ചസ്റ്റർ സിറ്റി വിടാനുള്ള ഒരുക്കത്തിലാണ്. പുതിയ ഒരു ചാലഞ്ച് ഏറ്റെടുക്കാൻ സമയമായി എന്നാണ് ഗുണ്ടോഗൻ കരുതുന്നത്. എഫ്സി ബാഴ്സലോണയിലേക്ക് തന്നെ പോവാനാണ് താരം ഇപ്പോൾ തീരുമാനിച്ചിട്ടുള്ളത്. മാത്രമല്ല ബാഴ്സയുമായി വെർബൽ അഗ്രിമെന്റിൽ എത്താൻ ഇപ്പോൾ ഗുണ്ടോഗന് കഴിഞ്ഞിട്ടുണ്ട്. പ്രമുഖ സ്പാനിഷ് മാധ്യമമായ ഡയാരിയോ സ്പോർട് ആണ് ഇക്കാര്യം റിപ്പോർട്ട് ചെയ്തിട്ടുള്ളത്.

മൂന്ന് വർഷത്തെ ഒരു കോൺട്രാക്ടിലാണ് ഗുണ്ടോഗൻ എഗ്രിമെന്റിൽ എത്തിയിട്ടുള്ളത്. ഫ്രീ ഏജന്റായി കൊണ്ടായിരിക്കും ഗുണ്ടോഗൻ ബാഴ്സലോണയിൽ എത്തുക. നിലവിൽ തകർപ്പൻ പ്രകടനമാണ് മാഞ്ചസ്റ്റർ സിറ്റിക്ക് വേണ്ടി ഈ ജർമ്മൻ സൂപ്പർ താരം നടത്തിക്കൊണ്ടിരിക്കുന്നത്. ഇംഗ്ലീഷ് പ്രീമിയർ ലീഗിൽ എട്ടു ഗോളുകളും 4 അസിസ്റ്റുകളും അദ്ദേഹം നേടിയിട്ടുണ്ട്. കഴിഞ്ഞ എവർടണെതിരെ നടന്ന മത്സരത്തിൽ രണ്ട് ഗോളുകളും ഒരു അസിസ്റ്റും നേടിക്കൊണ്ട് തിളങ്ങാൻ താരത്തിന് സാധിച്ചിരുന്നു.

ഗുണ്ടോഗനെ കൂടാതെ ലയണൽ മെസ്സിയെ തിരികെ എത്തിക്കുന്നതിനെയാണ് ബാഴ്സ ഏറ്റവും കൂടുതൽ പ്രാധാന്യം നൽകുന്നത്. ബ്രസീലിയൻ യുവസൂപ്പർതാരമായ വിറ്റോർ റോക്കിനേയും ഈ ട്രാൻസ്ഫർ ജാലകത്തിൽ ബാഴ്സക്ക് സ്വന്തമാക്കേണ്ടതുണ്ട്. പക്ഷേ സാമ്പത്തിക പ്രതിസന്ധിയും നിയന്ത്രണങ്ങളുമെല്ലാം ബാഴ്സക്ക് തലവേദന സൃഷ്ടിക്കുന്ന കാര്യമാണ്.