ബ്രസീലിയൻ സൂപ്പർ താരത്തെ റയലിന് വേണം,വിലയിട്ട് ക്ലബ്!

മുന്നേറ്റ നിരയിലേക്ക് രണ്ട് സൂപ്പർ താരങ്ങളെ എത്തിക്കാൻ പ്രീമിയർ ലീഗ് വമ്പൻമാരായ മാഞ്ചസ്റ്റർ സിറ്റിക്ക് ട്രാൻസ്ഫർ ജാലകത്തിൽ സാധിച്ചിരുന്നു.എർലിംഗ് ഹാലണ്ട്,ജൂലിയൻ ആൽവരസ് എന്നിവർ അടുത്ത സീസണിൽ മാഞ്ചസ്റ്റർ സിറ്റിയിൽ ഉണ്ടായേക്കും. അതുകൊണ്ടുതന്നെ മുന്നേറ്റനിരയിലെ ചില താരങ്ങളെ ഒഴിവാക്കാൻ മാഞ്ചസ്റ്റർ സിറ്റി ആലോചിക്കുന്നുണ്ട്.

അതിൽ പെട്ട ഒരു താരമാണ് ബ്രസീലിയൻ സൂപ്പർതാരമായ ഗബ്രിയേൽ ജീസസ്. താരത്തിന് വേണ്ടി നിരവധി ക്ലബ്ബുകൾ ഇപ്പോൾ രംഗത്തുണ്ട്. സ്പാനിഷ് വമ്പന്മാരായ റയൽ മാഡ്രിഡിന് ജീസസിൽ വലിയ താൽപ്പര്യമുണ്ട്.റയലിന്റെ പരിശീലകനായ കാർലോ ആഞ്ചലോട്ടിക്ക് വളരെയധികം ഇഷ്ടമുള്ള ഒരു താരമാണ് ഗബ്രിയേൽ ജീസസ്. പ്രമുഖ സ്പാനിഷ്‌ മാധ്യമമായ മാർക്കയാണ് ഇക്കാര്യം റിപ്പോർട്ട് ചെയ്തിരിക്കുന്നത്.

മാത്രമല്ല മാഞ്ചസ്റ്റർ സിറ്റി ഗബ്രിയേൽ ജീസസിന് ഇപ്പോൾ ഒരു വില കണ്ടുവെച്ചിട്ടുണ്ട്. 50 മില്യൺ യൂറോയാണ് താരത്തിന്റെ വിലയായി കൊണ്ട് മാഞ്ചസ്റ്റർ സിറ്റി നിശ്ചയിച്ചിരിക്കുന്നത്. ഇത് ചിലവഴിക്കാൻ റയൽ തയ്യാറാവുമോ എന്നുള്ളത് കണ്ടറിയേണ്ട കാര്യമാണ്.

അതേസമയം ജീസസിനെ സ്വന്തമാക്കുക എന്നുള്ളത് റയലിനെ സംബന്ധിച്ചിടത്തോളം എളുപ്പമുള്ള ഒരു കാര്യമാവില്ല. എന്തെന്നാൽ ആഴ്സണൽ, ടോട്ടൻഹാം,ചെൽസി,ബോറൂസിയ എന്നിവർക്കൊക്കെ താരത്തിൽ താല്പര്യമുണ്ട്.

ഈ ട്രാൻസ്ഫർ ജാലകത്തിൽ ചെൽസി സൂപ്പർ താരമായ അന്റോണിയോ റൂഡിഗറിനെ സ്വന്തമാക്കാൻ റയലിന് സാധിച്ചിരുന്നു. മാത്രമല്ല ഫ്രഞ്ച് സൂപ്പർ താരമായ ഷുവാമെനിയുമായി റയൽ മാഡ്രിഡ് കരാറിൽ എത്തുകയും ചെയ്തിട്ടുണ്ട്.