ബ്രസീലിയൻ വണ്ടർ കിഡിനെ സ്വന്തമാക്കാൻ റയൽ ശ്രമങ്ങളാരംഭിച്ചു!

ഈയിടെ ഫുട്ബോൾ ലോകത്തിന്റെ ശ്രദ്ധപിടിച്ചുപറ്റിയ വണ്ടർ കിഡാണ് പാൽമിറാസിന്റെ എൻഡ്രിക്ക്. കഴിഞ്ഞ കോപിഞ്ഞ ടൂർണമെന്റിൽ തകർപ്പൻ പ്രകടനമായിരുന്നു 15 വയസുകാരനായ എൻഡ്രിക്ക് പുറത്തെടുത്തത്.കണ്ണഞ്ചിപ്പിക്കുന്ന ചില ഗോളുകൾ അദ്ദേഹം ടൂർണമെന്റിൽ സ്വന്തമാക്കുകയും ചെയ്തിരുന്നു.

ഇപ്പോഴിതാ ഈ വണ്ടർ കിഡിനെ സ്വന്തമാക്കാനുള്ള ശ്രമങ്ങൾ സ്പാനിഷ് വമ്പന്മാരായ റയൽ തുടങ്ങിക്കഴിഞ്ഞു. പ്രമുഖ സ്പാനിഷ് മാധ്യമമായ മാർക്കയാണ് ഇക്കാര്യം റിപ്പോർട്ട് ചെയ്തിരിക്കുന്നത്.കഴിഞ്ഞ ദിവസം മാർക്ക എൻഡ്രിക്കിനെ ഇന്റർവ്യൂ ചെയ്തിരുന്നു.ഇതിന് ശേഷമാണ് മാർക്ക ഇത്തരത്തിലുള്ള ഒരു വാർത്ത പങ്കുവച്ചത്.

അതേസമയം റയലിനോടുള്ള തന്റെ ഇഷ്ടം എൻഡ്രിക്ക് ഈ അഭിമുഖത്തിൽ പങ്കുവെച്ചിട്ടുണ്ട്.കൂടാതെ ക്രിസ്റ്റ്യാനോ റൊണാൾഡോ തന്റെ ആരാധനാപാത്രമാണെന്നും എൻഡ്രിക്ക് കൂട്ടിച്ചേർത്തിട്ടുണ്ട്. താരത്തിന്റെ വാക്കുകൾ ഇങ്ങനെയാണ്.

” ക്രിസ്റ്റ്യാനോ റൊണാൾഡോയെ ഇഷ്ടപ്പെടുന്നതിലൂടെ എനിക്ക് വലിയ ബന്ധമുള്ള ഒരു ക്ലബ്ബാണ് റയൽ മാഡ്രിഡ്. ഞാൻ എപ്പോഴും CR7നെ പിന്തുടർന്നിരുന്നു. അദ്ദേഹം അവിടെ നാല് ചാമ്പ്യൻസ് ലീഗ് കിരീടങ്ങൾ നേടി.ഞാൻ റയലിന്റെ ചരിത്രം പരിശോധിക്കാറുണ്ട്. അവർ എപ്പോഴും ഒരു മികച്ച ടീമായിരിക്കും.അവരെല്ലാം എന്റെ മത്സരങ്ങൾ വീക്ഷിക്കുന്നുണ്ട് എന്നുള്ളത് എനിക്ക് വലിയ സന്തോഷം നൽകുന്ന ഒരു കാര്യമാണ്. ഞാൻ അതിനെ ദൈവത്തോട് നന്ദി പറയുന്നു.എനിക്കിനിയും ഒരുപാട് കാര്യങ്ങൾ ചെയ്യാനും ഒരുപാട് ദൂരം സഞ്ചരിക്കാനുമുണ്ട്.തീർച്ചയായും ഞാൻ യൂറോപ്പിൽ കളിക്കുന്നതിനെ ഇഷ്ടപ്പെടുന്നു ” ഇതാണ് എൻഡ്രിക്ക് പറഞ്ഞത്.

ബ്രസീലിൽ നിന്നും വണ്ടർ കിഡിനെ സ്വന്തമാക്കുന്നത് റയലിന് പുതുമയുള്ള കാര്യമൊന്നുമല്ല.വിനീഷ്യസ് ജൂനിയർ,റോഡ്രിഗോ,റെയ്നീർ ജീസസ് എന്നിവർ ഇങ്ങനെ റയലിൽ എത്തിയവരാണ്.