ഫാറ്റി ഇനി റൊണാൾഡോയുടെ ഏജന്റിന് കീഴിൽ, മെസ്സിയുടെ സഹോദരനെ ഒഴിവാക്കി !

എഫ്സി ബാഴ്സലോണയുടെ യുവസൂപ്പർ അൻസു ഫാറ്റിയായിരുന്നു ഈ സീസണിൽ ക്ലബിന്റെ ഏക ആശ്വാസം യുവേഫ ചാമ്പ്യൻസ് ലീഗിലും ലാലിഗയിലും ഗോൾ നേടി കൊണ്ട് റെക്കോർഡ് ഇട്ട താരം അടുത്ത സീസണിൽ സീനിയർ ടീമിലേക്ക് പ്രൊമോഷൻ നേടാനൊരുങ്ങി നിൽക്കുകയാണ്. പതിനേഴുകാരനായ താരം പുതിയ സീസണിന് മുന്നോടിയായി നിർണായകമായ ഒരു മാറ്റം വരുത്തിയിരിക്കുകയാണ് താരത്തിന്റെ ഏജന്റ് ആയി പുതുതായി നിയമിച്ചത് പ്രമുഖ ഏജന്റ് ആയ ജോർജെ മെൻഡസിനെയാണ്. മാർക്കയാണ് ഇത് റിപ്പോർട്ട്‌ ചെയ്തത്. സൂപ്പർ താരം ക്രിസ്റ്റ്യാനോ റൊണാൾഡോ, ബെർണാഡോ സിൽവ, എഡേഴ്‌സൺ എന്നിവരുടെയൊക്കെ ഏജന്റ് ആണ് മെൻഡസ്. അദ്ദേഹത്തിന്റെ കീഴിലുള്ള ഗെസ്റ്റിഫൂട്ട് ആണ് ഇനി ഫാറ്റിയുടെ ഇടപാടുകൾ കൈകാര്യം ചെയ്യുക.

ഇതുവരെ മെസ്സിയുടെ സഹോദരനായ റോഡ്രിഗോ മെസ്സിയുടെ കീഴിൽ ആയിരുന്നു ഫാറ്റി. എന്നാൽ പുതിയ സീസണിൽ താരം ഏജന്റിനെ മാറ്റാൻ തീരുമാനിക്കുകയായിരുന്നു. ഈ വരുന്ന ഒക്ടോബറിൽ ആണ് താരത്തിന് 18 വയസ്സ് തികയുക. താരത്തിന്റെ കരാർ പുതുക്കാനും ശമ്പളം വർധിപ്പിക്കാനും ബാഴ്സ ആലോചിക്കുന്നുണ്ട്. കഴിഞ്ഞ വർഷം താരത്തിന്റെ കരാർ ബാഴ്‌സ പുതുക്കിയിരുന്നു. അത് പ്രകാരം 170 മില്യൺ പൗണ്ട് ആണ് താരത്തിന്റെ റിലീസ് ക്ലോസ്. അതും വർധിപ്പിക്കാൻ ഉദ്ദേശമുണ്ട്. പ്രത്യേകിച്ച് മാഞ്ചസ്റ്റർ യുണൈറ്റഡ് ബാഴ്സയെ സമീപിച്ച സാഹചര്യത്തിൽ. താരം ഒരിക്കലും വിൽക്കാൻ ഉള്ളതല്ല എന്ന് ബാഴ്സ പ്രസിഡന്റ്‌ ബർതോമ്യു മുൻപ് തന്നെ അറിയിച്ചിരുന്നു. ഏതായാലും അടുത്ത സീസണിൽ കൂമാന് കീഴിൽ നല്ലൊരു അവസരം തന്നെ താരത്തിന് ലഭിക്കും.