നെയ്മർ ബാഴ്സയെ ഇഷ്ടപ്പെടുന്നു, കാരണം അവരുടെ സ്നേഹം തന്നെ: ആർതർ മെലോ.

2013ലായിരുന്നു നെയ്മർ ജൂനിയർ ബ്രസീലിയൻ ക്ലബ്ബായ സാന്റോസിൽ നിന്നും എഫ്സി ബാഴ്സലോണയിൽ എത്തിയത്.തകർപ്പൻ പ്രകടനമാണ് പിന്നീട് ബാഴ്സക്ക് വേണ്ടി നെയ്മർ പുറത്തെടുത്തിരുന്നത്.എന്നാൽ 2017ൽ നെയ്മറെ അപ്രതീക്ഷിതമായി കൊണ്ട് ബാഴ്സക്ക് നഷ്ടമായി. ലോക റെക്കോർഡ് തുകക്ക് നെയ്മറെ പിഎസ്ജി സ്വന്തമാക്കുകയായിരുന്നു.പിന്നീട് ഒരുപാട് തവണ നെയ്മർ ബാഴ്സയിലേക്ക് തന്നെ മടങ്ങിയെത്താൻ ശ്രമിച്ചുവെങ്കിലും അത് വിഫലമാവുകയായിരുന്നു.

ഈ സമ്മർ ട്രാൻസ്ഫർ ജാലകത്തിലും നെയ്മർ സ്വയം ബാഴ്സക്ക് ഓഫർ ചെയ്തിരുന്നുവെങ്കിലും അത് ക്ലബ്ബ് നിരസിക്കുകയായിരുന്നു. ഇതേക്കുറിച്ച് ബ്രസീലിയൻ താരമായ ആർതർ മെലോയോട് പുതിയ അഭിമുഖത്തിൽ ചോദിച്ചിരുന്നു. ഓഫർ ചെയ്തതിനെ കുറിച്ച് അദ്ദേഹത്തിന് അറിവില്ലെങ്കിലും നെയ്മർ ഇപ്പോഴും ബാഴ്സയെ വളരെയധികം ഇഷ്ടപ്പെടുന്നുണ്ട് എന്നാണ് ആർതർ പറഞ്ഞിട്ടുള്ളത്. അതിന്റെ കാരണം ബാഴ്സയുടെ സ്നേഹമാണെന്നും ആർതർ കൂട്ടിച്ചേർത്തു.അദ്ദേഹത്തിന്റെ വാക്കുകൾ ഇങ്ങനെയാണ്.

” ഈ സമ്മർ ട്രാൻസ്ഫർ ജാലകത്തിൽ നെയ്മർ സ്വയം ബാഴ്സക്ക് ഓഫർ ചെയ്തുവോ എന്ന കാര്യത്തിൽ എനിക്ക് അറിവില്ല. അദ്ദേഹം അതേക്കുറിച്ച് എന്നോട് സംസാരിച്ചിട്ടില്ല.പക്ഷേ അദ്ദേഹം ബാഴ്സയെ ഒരുപാട് ഇഷ്ടപ്പെടുന്നു എന്നുള്ള കാര്യം എനിക്കറിയാം. നെയ്മർക്ക് ബാഴ്സയോട് ഒരുപാട് പാഷൻ ഉണ്ട്.കാരണം ആ ക്ലബ്ബും നഗരവും ആരാധകരും അത്രയേറെ നല്ല രീതിയിലായിരുന്നു അദ്ദേഹത്തോട് പെരുമാറിയിരുന്നത് ” ഇതാണ് ആർതർ പറഞ്ഞിട്ടുള്ളത്.

നെയ്മർ ജൂനിയർ ഈ സമ്മറിൽ പിഎസ്ജി വിടുമെന്നുള്ള റൂമറുകൾ പുറത്തേക്ക് വന്നിരുന്നു.പക്ഷെ ഇപ്പോൾ പിഎസ്ജി നെയ്മർക്ക് കൂടുതൽ പ്രാധാന്യം കൽപ്പിക്കുന്നുണ്ട്. എന്തെന്നാൽ മെസ്സി ക്ലബ്ബ് വിട്ടു കഴിഞ്ഞു.കിലിയൻ എംബപ്പേയേയും പിഎസ്ജിക്ക് നഷ്ടമാവുകയാണ്.ഈയൊരു അവസരത്തിൽ നെയ്മറെ കേന്ദ്രീകരിക്കാനാണ് ക്ലബ്ബിന്റെ തീരുമാനം.