നെയ്മർക്കൊപ്പം കളിക്കണം, ആഗ്രഹം തുറന്ന് പറഞ്ഞ് ജാവോ ഫെലിക്സ്!

വലിയ പ്രതീക്ഷകളോട് കൂടിയായിരുന്നു പോർച്ചുഗീസ് സൂപ്പർ താരമായിരുന്ന ജാവോ ഫെലിക്സിനെ അത്ലറ്റിക്കോ സ്വന്തമാക്കിയിരുന്നത്. താരത്തിന് വേണ്ടി വലിയ തുക അത്ലറ്റിക്കോ മുടക്കുകയും ചെയ്തിരുന്നു. എന്നാൽ ഫെലിക്സിന് പ്രതീക്ഷിച്ച രൂപത്തിൽ തിളങ്ങാനായിരുന്നില്ല. മാത്രമല്ല താരത്തെ പരിക്കുകൾ അലട്ടുകയും ചെയ്തിരുന്നു.നിലവിൽ പരിക്കിൽ നിന്നും മുക്തനായ താരം ഇപ്പോൾ അത്ലറ്റിക്കോക്ക്‌ വേണ്ടി കളിച്ചു തുടങ്ങിയിട്ടുണ്ട്.

ഏതായാലും സൂപ്പർ താരം നെയ്മർ ജൂനിയർക്കൊപ്പം കളിക്കണമെന്നുള്ള തന്റെ ആഗ്രഹം ഇപ്പോൾ ജാവോ ഫെലിക്സ് തുറന്ന് പറഞ്ഞിട്ടുണ്ട്. അങ്ങനെ സംഭവിച്ചാൽ നെയ്മർക്കും തനിക്കും ഒരു നല്ല ജോഡിയാവാൻ കഴിയുമെന്നുള്ള പ്രതീക്ഷയും താരം വെച്ച് പുലർത്തുന്നുണ്ട്.കഴിഞ്ഞ ദിവസം ടിഎൻടി സ്പോർട്സിനോട് സംസാരിക്കുകയായിരുന്നു ഫെലിക്സ്.

” നെയ്മർ ജൂനിയർക്കൊപ്പം കളിക്കാൻ ഞാൻ ആഗ്രഹിക്കുന്നു.ഞങ്ങൾക്ക്‌ മികച്ച ഒരു ജോഡിയാവാൻ കഴിയുമെന്നാണ് ഞാൻ കരുതുന്നത്.പക്ഷേ നെയ്മർക്കൊപ്പം ചേരാൻ കഴിയുമോ എന്നുള്ള കാര്യം എനിക്കറിയില്ല.പക്ഷെ നല്ലൊരു ടീം ഉണ്ടാക്കാൻ കഴിയുമെന്ന് ഞാൻ കരുതുന്നു ” ഇതാണ് ജാവോ ഫെലിക്സ് പറഞ്ഞിട്ടുള്ളത്.

പിഎസ്ജി സൂപ്പർ താരമായ നെയ്മർ ഈയിടെ ക്ലബുമായി കരാർ പുതുക്കിയിരുന്നു.ഫ്ലെമെങ്കോയാണ് തന്റെ ഇഷ്ടപ്പെട്ട ബ്രസീലിയൻ ടീം എന്ന് പറഞ്ഞ ഫെലിക്സ് ബ്രസീലിയൻ ലീഗിൽ എന്നെങ്കിലും ഒരു ദിവസം നെയ്മർക്കൊപ്പം കളിക്കാൻ കഴിയുമെന്നുള്ള പ്രതീക്ഷയാണ് വെച്ച് പുലർത്തുന്നത്.