ഡി പോളിനെ കൂവി ആരാധകർ, തനിക്ക് മനസ്സിലാകുമെന്ന് താരം!

കഴിഞ്ഞ മത്സരത്തിൽ എതിരില്ലാത്ത രണ്ട് ഗോളുകൾക്കായിരുന്നു അത്ലറ്റിക്കോ മാഡ്രിഡ് ലാസ് പാൽമസിനെ പരാജയപ്പെടുത്തിയിരുന്നത്. മത്സരത്തിന്റെ സ്റ്റാർട്ടിങ് ഇലവനിൽ അർജന്റൈൻ സൂപ്പർ താരമായ റോഡ്രിഗോ ഡി പോളിന് അവസരം ലഭിച്ചിരുന്നില്ല. രണ്ടാം പകുതിയിലാണ് അദ്ദേഹം കളിക്കളത്തിലേക്ക് വന്നത്.ആ സമയത്ത് വലിയ കൂവലുകളാണ് താരത്തിന് ലഭിച്ചത്.അത്ലറ്റിക്കോ മാഡ്രിഡിന്റെ ആരാധകർ തന്നെയാണ് താരത്തെ കൂവി വിളിച്ചിട്ടുള്ളത്.

സമീപകാലത്ത് ആരാധകർ പ്രതീക്ഷിക്കുന്ന പോലെയുള്ള പ്രകടനം പുറത്തെടുക്കാൻ ഡി പോളിന് കഴിയുന്നില്ല. അതുകൊണ്ടുതന്നെയാണ് സ്വന്തം ആരാധകർ അദ്ദേഹത്തെ കൂടിയിട്ടുള്ളത്. പക്ഷേ അതിനെ പോസിറ്റീവ് ആയ രീതിയിലാണ് ഡി പോൾ എടുത്തിട്ടുള്ളത്.കൂവൽ തനിക്ക് മനസ്സിലാകുമെന്നും ആരാധകർ തന്നിൽ നിന്നും കൂടുതൽ ഡിമാൻഡ് ചെയ്യുന്നുണ്ട് എന്നുമാണ് ഡി പോൾ പറഞ്ഞിട്ടുള്ളത്. അദ്ദേഹത്തിന്റെ വാക്കുകളെ മുണ്ടോ ഡിപ്പോർട്ടിവോ റിപ്പോർട്ട് ചെയ്തിരിക്കുന്നത് ഇങ്ങനെയാണ്.

” ആരാധകരുടെ കൂവൽ എനിക്ക് പൂർണ്ണമായും മനസ്സിലാകും.അവർ എന്നിൽ നിന്നും കൂടുതൽ ഡിമാൻഡ് ചെയ്യുന്നു എന്നത് നല്ല കാര്യമാണ്. അതിനർത്ഥം എനിക്ക് ഇനിയും കൂടുതൽ നൽകാൻ ഉണ്ട് എന്നതാണ്.അതുകൊണ്ടുതന്നെ ഞാൻ അതിനെ സ്വാഗതം ചെയ്യുന്നു.നമ്മൾക്ക് എല്ലാവർക്കും കൂടുതൽ വളരാനുണ്ട്. എനിക്ക് ഇനിയും കൂടുതൽ മെച്ചപ്പെട്ട പ്രകടനം നടത്താൻ കഴിയും എന്ന് ആരാധകർ വിശ്വസിക്കുന്നു.അതാണ് ഏറ്റവും പ്രധാനപ്പെട്ട കാര്യം ” ഇതാണ് അർജന്റൈൻ സൂപ്പർ താരം പറഞ്ഞിട്ടുള്ളത്.

രണ്ടാം പകുതിയിൽ ഇറങ്ങിയതിനു ശേഷം ഒരു അസിസ്റ്റ് സ്വന്തമാക്കാൻ ഡി പോളിന് കഴിഞ്ഞിരുന്നു. അർജന്റീന ദേശീയ ടീമിൽ പലപ്പോഴും തകർപ്പൻ പ്രകടനം ഡി പോൾ നടത്താറുണ്ട്. എന്നാൽ തന്റെ ക്ലബ്ബിൽ അത് ആവർത്തിക്കാൻ അദ്ദേഹത്തിന് കഴിയാറില്ല. 11 മത്സരങ്ങൾ ലാലിഗയിൽ കളിച്ച ഡി പോൾ ഗോളുകൾ ഒന്നും നേടിയിട്ടില്ല.രണ്ട് അസിസ്റ്റുകൾ അദ്ദേഹം സ്വന്തമാക്കിയിട്ടുണ്ട്.