ഞാൻ മെസ്സിയെ മിസ് ചെയ്യുന്നു,അദ്ദേഹത്തിന് ക്യാപ്റ്റൻ സ്ഥാനം തിരികെ നൽകാൻ തയ്യാർ : ബുസ്ക്കെറ്റ്സ്!

ഈ സീസണിലായിരുന്നു സൂപ്പർ താരം ലയണൽ മെസ്സിക്ക് എഫ്സി ബാഴ്സലോണ വിടേണ്ടി വന്നത്. സാമ്പത്തിക പ്രശ്നങ്ങൾ കാരണമാണ് മെസ്സിക്ക് ബാഴ്സയിലെ സ്ഥാനം നഷ്ടമായത്.പിന്നീട് പിഎസ്ജിയിലേക്കെത്തിയ താരം നിലവിൽ ഒരു പ്രതിസന്ധി ഘട്ടത്തിലൂടെയാണ് കടന്നു പോയിക്കൊണ്ടിരിക്കുന്നത്.

ഏതായാലും ലയണൽ മെസ്സിയെ പറ്റിയുള്ള ചില കാര്യങ്ങൾ അദ്ദേഹത്തിന്റെ മുൻ സഹ താരമായ സെർജിയോ ബുസ്ക്കെറ്റ്സ് ഇപ്പോൾ പങ്കുവെച്ചിട്ടുണ്ട്.അതായത് മെസ്സിയെ താൻ മിസ് ചെയ്യുന്നു എന്നാണ് ബുസ്ക്കെറ്റ്സ് പറഞ്ഞിട്ടുള്ളത്. മെസ്സി ബാഴ്സയിലേക്ക് തിരികെ എത്തുകയാണെങ്കിൽ ക്യാപ്റ്റൻ സ്ഥാനം അദ്ദേഹത്തിന് തിരിച്ചു നൽകാൻ താൻ തയ്യാറാണെന്നും ബുസ്ക്കെറ്റ്സ് കൂട്ടിച്ചേർത്തിട്ടുണ്ട്. അദ്ദേഹത്തിന്റെ വാക്കുകളെ ഗോൾ ഡോട്ട് കോം റിപ്പോർട്ട് ചെയ്യുന്നത് ഇങ്ങനെയാണ്.

” മെസ്സിക്ക് ക്ലബ്ബ് വിടേണ്ടി വന്നത് ഒരു ബുദ്ധിമുട്ടേറിയ കാര്യമായിരുന്നു.അത് തുടക്കത്തിൽ ഞങ്ങളെയെല്ലാം ഞെട്ടിച്ചു കളഞ്ഞു. മെസ്സി ബാഴ്സയിലേക്ക് തിരികെ എത്താൻ ഞാൻ ഇഷ്ടപ്പെടുന്നു. പക്ഷേ ഇപ്പോൾ അദ്ദേഹത്തിന് മറ്റൊരു ക്ലബ്ബുമായി കരാറുണ്ട്. അദ്ദേഹത്തിന് ക്ലബ് വിടേണ്ടി വന്ന സാഹചര്യം വളരെയധികം സങ്കീർണമാണ്. മെസ്സി നൽകിയതുപോലെ ഒരാളും തന്നെ ക്ലബ്ബിന് വേണ്ടി ഇതുവരെ നൽകിയിട്ടില്ല. അദ്ദേഹത്തെ ഞാൻ മിസ് ചെയ്യുന്നു, അദ്ദേഹം എന്നെയും മിസ് ചെയ്യുമെന്ന് എനിക്കുറപ്പാണ്. അദ്ദേഹത്തിനുവേണ്ടി ബാഴ്സയുടെ വാതിലുകൾ തുറന്നിട്ടിരിക്കുകയാണന്ന് സാവി പറഞ്ഞിരുന്നു. അദ്ദേഹം തിരികെ എത്തിയാൽ ക്യാപ്റ്റൻ സ്ഥാനം തിരികെ നൽകാൻ ഞാൻ തയ്യാറാണ്. അദ്ദേഹത്തിന് എന്റെ ബഹുമാനവും ഇഷ്ടവുമുണ്ട് ” ബുസ്ക്കെറ്റ്സ് പറഞ്ഞു.

ഈയിടെ മെസ്സി ബാഴ്സയിലേക്ക് തിരികെ എത്തുമെന്നുള്ള അഭ്യുഹങ്ങൾ സജീവമായിരുന്നു. എന്നാൽ മെസ്സിയെ കൊണ്ടുവരാൻ ഉദ്ദേശിക്കുന്നില്ലെന്ന് ബാഴ്സ പ്രസിഡന്റ് ലാപോർട്ട തുറന്നു പറഞ്ഞിരുന്നു.