ഞങ്ങളുടെ മുന്നേറ്റ നിര അവിശ്വസനീയം: തുറന്ന് പറഞ്ഞ് ഫ്ലിക്ക്!

ഇന്നലെ ലാലിഗയിൽ നടന്ന മത്സരത്തിൽ ഒരു ഗംഭീര വിജയമാണ് ബാഴ്സലോണ സ്വന്തമാക്കിയിട്ടുള്ളത്. എതിരില്ലാത്ത മൂന്ന് ഗോളുകൾക്കാണ് അവർ അലാവസിനെ പരാജയപ്പെടുത്തിയിട്ടുള്ളത്. സൂപ്പർ താരം റോബർട്ട് ലെവന്റോസ്ക്കിയുടെ ഹാട്രിക്കാണ് അവർക്ക് തുണയായിട്ടുള്ളത്. രണ്ട് അസിസ്റ്റുകൾ റാഫിഞ്ഞ സ്വന്തമാക്കിയപ്പോൾ ഒരു അസിസ്റ്റ് ഗാർഷ്യയുടെ വകയായിരുന്നു.

ബാഴ്സലോണയുടെ മുന്നേറ്റ നിര ഗംഭീരപ്രകടനമാണ് ഇപ്പോൾ പുറത്തെടുക്കുന്നത്.ലെവന്റോസ്ക്കി 10 ഗോളുകളും രണ്ട് അസിസ്റ്റുകളും സ്വന്തമാക്കി കഴിഞ്ഞു.റാഫിഞ്ഞ 5 ഗോളുകളും 5 അസിസ്റ്റുകളും സ്വന്തമാക്കിയപ്പോൾ യമാൽ 4 ഗോളുകളും 5 അസിസ്റ്റുകളും സ്വന്തമാക്കിയിട്ടുണ്ട്.ഈ താരങ്ങളെ പ്രശംസിച്ചു കൊണ്ട് അവരുടെ പരിശീലകനായ ഫ്ലിക്ക് തന്നെ രംഗത്ത് വന്നിട്ടുണ്ട്.ഈ താരങ്ങൾ അവിശ്വസനീയമാണ് എന്നാണ് പരിശീലകൻ പറഞ്ഞിട്ടുള്ളത്. അദ്ദേഹത്തിന്റെ വാക്കുകൾ ഇങ്ങനെയാണ്.

” തീർച്ചയായും അവർക്കിടയിൽ കെമിസ്ട്രി ഉണ്ടാക്കിയെടുക്കാൻ ഞങ്ങൾ വർക്ക് ചെയ്തിരുന്നു. എല്ലാ ട്രെയിനിങ്ങുകളിലും ടാക്റ്റികൽ സൈഡും പൊസിഷനുകളും കൃത്യമായി അവർക്ക് വിശദീകരിച്ച് നൽകേണ്ടതുണ്ട്.അവർ മികച്ച രൂപത്തിൽ തന്നെയാണ് കാര്യങ്ങളെ കൈകാര്യം ചെയ്യുന്നത്.അവിശ്വസനീയമായ രീതിയിലാണ് ഈ താരങ്ങൾ കളിക്കുന്നത്.ഞങ്ങൾ ഒരുപാട് ഗോളുകൾ നേടുന്നുണ്ട്.അത് നല്ല കാര്യമാണ്,ഞങ്ങളെ സഹായിക്കുകയും ചെയ്യും.അടുത്ത മത്സരങ്ങളിൽ ആത്മവിശ്വാസം പകർന്നു നൽകുക ഇത്തരം ഗോളുകളാണ്. നല്ല രീതിയിൽ കളിക്കുക എന്നുള്ളത് മാത്രമാണ് ഞങ്ങളുടെ ആശയം ” ഇതാണ് ബാഴ്സലോണയുടെ പരിശീലകൻ പറഞ്ഞിട്ടുള്ളത്.

ഈ സീസണിൽ ആകെ 11 മത്സരങ്ങളാണ് ബാഴ്സലോണ കളിച്ചിട്ടുള്ളത്. അതിൽ അഞ്ചുമത്സരങ്ങളിൽ മൂന്നോ അതിലധികമോ ഗോളുകൾ നേടാൻ ബാഴ്സലോണക്ക് കഴിഞ്ഞിട്ടുണ്ട്. ലാലിഗയിൽ 9 മത്സരങ്ങൾ കളിച്ച ബാഴ്സ 28 ഗോളുകൾ നേടിയിട്ടുണ്ട്.ഈ മിന്നുന്ന പ്രകടനം ആരാധകർക്ക് ഏറെ സന്തോഷം നൽകുന്ന കാര്യമാണ്.